Бугун тунда тўлиқ қуёш тутилиши ҳодисаси рўй беради. Уни қандай кузатиш мумкин?

Ноёб жараённи трансляция орқали Ер юзидаги исталган киши томоша қила олади.

2 июлдан 3 июлга ўтар кечаси Чили ва Аргентинада истиқомат қилувчилар ноёб ҳодиса — тўлиқ қуёш тутилишини ўз кўзлари билан кўришлари мумкин. Қолганлар эса Американинг «Эксплораториум» музейи ташкиллаштирган трансляция орқали жараённи кузатиш имконига эга.

Ер ва Қуёш орасига Ой тўғри келиб қолса, Қуёш тутилиши рўй беради. Ернинг табиий йўлдоши Қуёшдан келувчи барча нурларни ёпган ҳолатида тўлиқ тутилиш кузатилади ва Ернинг айрим қисмларига тўлиқ соя тушади.

Жанубий Америка аҳолиси бугунги Қуёш тутилишига қисман гувоҳ бўлишади. Лекин Чили ва Аргентинанинг баъзи қисмлари, шунингдек Тинч океанининг кичик ҳудудларида Ой Қуёшни тўлиқ ёпиб қўяди.

4 ярим дақиқа давом этувчи тутилишнинг жонли эфири Тошкент вақти билан тунги соат 01:00да бошланади. Ҳодисани музей сайтида, шунингдек iOS ва Android учун мўлжалланган бепул иловалар орқали кузатиш мумкин.