Шунингдек, Туркия суриялик ҳарбийларнинг Ҳалабдаги аэродромига зарбалар йўллаган ва эндиликда аэродром «фойдаланиш учун яроқсиз» аҳволга келган. Бу аэродром орқали турк ҳарбийларига ҳужумлар уюштирилганди.
Айни вақтда Сурия Идлиб ҳаво кенгликларини ёпиқ деб эълон қилди - энди сурияликлар Идлиб осмонидаги ҳар қандай учар объектни уриб туширишмоқчи.
Қуриқликда Сурия армияси ва мухолифат кучлари ўртасидаги тўқнашувлар давом этмоқда. Туркия ўз иттифоқчиларини артиллерия зарбалари орқали қўллаб-қувватламоқда - Сурия армиясининг ҳаво ҳужумидан мудофаа тизимлари ва зирҳли техникаларига зарбалар берилмоқда.
Идлибдаги вазият 27 февраль куни кечқурун туркиялик 33 нафар ҳарбий Сурия авиацияси зарбалари оқибатида ҳалок бўлгач кескинлашди. Ўшанда Асад кучлари мухолифатнинг Серакибни қайтариб олиш бўйича уринишларига жавобан ҳаво зарбалари йўллаганди.
Туркия Сурияда катта йўқотишга учради. Тафсилотлар
Туркия Мудофаа вазири Хулуси Оқар якшанба куни телевидение орқали чиқиш қилиб, «Баҳор қалқони» амалиёти бошланганидан буён Сурия ҳукумати кучларининг 2212 нафар ҳарбийси йўқ қилингани, 103та танк, 8 вертолёт ва 1 дрон яксон этилгани, шунингдек, сурияликларнинг бошқа ҳарбий жиҳозларига зарбалар берилгани ҳақида маълум қилди.
Офиси Лондонда жойлашган Сурия инсон ҳуқуқлари мониторинги маркази маълумотига кўра эса, Сурия ҳарбий хизматчилари йўқотишлари сони 74 нафар бўлган.
Идлибдаги вазият Туркиянинг Дамашқни қўлловчи Россия билан муносабатларини ҳам совуқлаштирмоқда. Аммо Хулуси Оқарнинг айтишича, турклар буни истамаслигини айтган.
«Биз Россия [Сурия] режими томонидан зарбалар берилишини тўхтатишини истаймиз. Биз Россия билан тўқнашиш истамаймиз ва тўқнашмоқчи ҳам эмасмиз», деган у.
Янги ҳафта давомида Эрдўған ва Путин ўзаро учрашиб, Идлибдаги вазиятни муҳокама қилмоқчи. Учрашув 5 март куни Хорватия пойтахти Загребда бўлиб ўтади, шу куни бу ерда Европа Иттифоқи давлатлари ташқи ишлар вазирлари учрашуви ҳам ўтказилади.
