Ҳаага суди Нидерландияда комендантлик соати дарҳол бекор қилинишини талаб қилди

Ҳаага суди Нидерландияда коронавирус сабабли киритилган комендантлик соати зудлик билан бекор қилиниши кераклиги тўғрисида қарор чиқарди. Бу ҳақда DutchNews хабар бермоқда.

Суднинг фикрича, бундай кескин чора жорий этилиши учун асос бўлмаган. Шу билан бирга, қайд этилишича, комендантлик соати ҳаракатланиш эркинлиги ва инсонларнинг шахсий ҳаёт кечириш ҳуқуқини жиддий равишда чеклайди.

Нидерландияда комендантлик соати январ ўрталарида жорий этилганди ва 3 мартгача узайтирилган. У соат 21дан 4 яримгача амал қилади. 

Мамлакат адлия вазирлиги суд қарорини ўрганиб чиқишини билдирган.