Виктор Серазитдинов номуайян муддатга ҳакамликдан четлатилди. ЎФА «Сўғдиёна» – «Турон» учрашуви бўйича баёнот берди

«Бугун, 15 март куни ЎФА Ҳакамлик қўмитаси томонидан мазкур баҳсни бошқариб борган бош ҳакам Виктор Серазитдиновнинг ўйин давомидаги хатти-ҳаракатлари атрофлича таҳлил қилиб чиқилди.

Мутахассислар «Сўғдиёна» - «Турон» учрашуви видео-лавҳасини қайта кўриб, вазиятларни синчковлик билан ўрганиб чиқди. Таҳлил натижасида, бош ҳакам Виктор Серазитдинов учрашувнинг 29-дақиқасида «Сўғдиёна» дарвозаси томон 11 метрлик жарима зарбаси белгиламаганлиги аниқланди. Шунингдек, бош ҳакам 52-дақиқада «Турон» футболчиси ўз жарима майдонида тўпни қўли билан ўйнади дея баҳолаб, пенальти белгилаган вазият хато эканлиги қўмита вакиллари томонидан қайд этилди.

ЎФА Ҳакамлик қўмитасининг якуний қарорига мувофиқ, қўпол хатоларга йўл қўйганлиги ҳамда ушбу хатолар ўйин натижасига таъсир ўтказганлиги сабабли Виктор Серазитдиновнинг мазкур учрашувдаги фаолияти қониқарсиз деб баҳоланди ва ҳакамлик фаолиятидан номуайян муддатга четлатилди.

Шунингдек, ЎФА футбол фаолиятини назорат қилиш махсус инспекцияси томонидан мазкур ҳолат бўйича тегишли маълумотлар, мазкур футбол учрашуви қайдномаси ва инспектор ҳисоботи, видеоматериалларни ўрганиб чиқиш ишлари бошланди. Ноқонуний ҳолатлар аниқланган тақдирда ЎФА Этика қўмитаси тегишли тартибда кўриб чиқиб, якуний қарорларни қабул қилади», - дейилади ЎФА баёнотида.

Эслатиб ўтамиз, ушбу ўйиндан кейинги матбуот анжуманида «Турон» бош мураббийи Исломбек Исмоилов ўйиндаги ва ўзбек футболидаги ҳакамларнинг қинғирликлари ҳақида очиқ-ойдин гапирганди.

Маълумот учун, Жиззахдаги мағлубиятдан кейин «Турон» жамоаси турнир жадвалида сўнгги 14-ўринга тушган бўлса, «Сўғдиёна» пенальтидан киритилган гол эвазига ғалаба қозониб, 6 очко билан Суперлига пешқадамига айланиб олди.