Ҳолифилд Тайсонни мағлуб этган боксчига қарши рингга чиқади

Ўта оғир вазнда собиқ жаҳон чемпиони Эвандер Ҳолифилд Кевин Макбрайдга қарши кўргазмали жанг ўтказишга рози бўлди. Бу ҳақда Boxing Scene хабар берди.

58 ёшли Ҳолифилд 5 июнь куни 47 ёшли рақибига қарши рингга чиқади. Жанг икки дақиқадан саккиз раунд бўлиши кўзда тутилган.

Бу Ҳолифилднинг 2011 йилдан буён ўтказилган биринчи жанги бўлади. Унинг рақиби Макбрайд ҳам фаолиятини 2011 йилда якунлаган. У 2005 йилда Майк Тайсон устидан ғалаба қозонганидан сўнг танилган.

Ҳолифилд ўтган йил декабрда Майк Тайсонни жангга чорлаганди. Боксчилар илгари икки марта тўқнаш келишган, ҳар икки жангда Ҳолифилд ғалаба қозонган.