Тахиатош тумани ҳокими қамоққа олинди

1 ноябрь куни Тахиатош тумани ҳокими Илҳом Маткаримов фермер хўжалиги раҳбаридан фирибгарлик йўли билан 100 млн сўм пул олгани ҳолати бўйича жиноят иши қўзғатилиб, қамоққа олинган.

Қорақалпоғистон Республикаси прокуратурасига таяниб, ЎзАнинг хабар беришича, жиноят иши Жиноят кодексининг 168-моддаси (фирибгарлик) 3-қисми ва 25, 211-моддаси (пора бериш) 2-қисми билан қўзғатилган.

Терговни Қорақалпоғистон Республикаси прокуратураси олиб бормоқда.

Илҳом Маткаримов 2020 йил июнидан буён Тахиатош туманини бошқариб келмоқда. У 2018—2020 йилларда Мўйноқ тумани прокурори бўлган.

• Октябр ойи охирида Урганч тумани ҳокими ўринбосари 43 минг доллар пора билан ушланган эди.
• Ҳозирда Сурхондарёнинг Термиз шаҳри ва Музработ тумани собиқ ҳокимлари, шунингдек, Қарши шаҳрининг собиқ ҳокими устидан тергов кетяпти.