Херсон ўққа тутилмоқда, Киевга дронлар ҳужуми давом этмоқда. Уруш суратлари

 Украинада урушнинг 294-куни ўтди. Асосий маълумотлар:

• Киевга Россиядан учирилган Эрон дронлари билан ҳужум уюштирилди. Киев области расмийларига кўра, Украина ҳаво ҳужумидан мудофаа тизимлари 13 дона камикадзе дронларни уриб туширган. Дронларнинг парчалари шаҳардаги бешта бинони шикастлаган;
• Украиналик омбудсмен Дмитро Лубинец Херсонда вояга етмаганлар ушлаб турилган «болалар камераси» аниқланганини хабар қилди;
• Давлат думасида Украинанинг босиб олинган ҳудудларида РФ манфаатлари доирасида содир этилган жиноятлар учун жазони бекор қилиш таклиф этилди;
• Давлат думаси Россия IT-компанияларининг хорижга кетган ходимларининг РФда масофадан ишлаш ҳуқуқини чеклаш тўғрисидаги қонун лойиҳасини кўриб чиқишни режалаштирмоқда. Рақамли ривожлантириш вазирлиги бу ташаббусга қарши;
• Депутатлар қўпорувчилик фаолияти учун жиноий жазо тўғрисидаги қонун лойиҳасини биринчи ўқишдаёқ қабул қилишди;
• 24 февралдан кейин қарийб саккиз миллион украиналик хорижга кетган. Бу амалда мамлакат аҳолисининг 20 фоизини ташкил этади.

Қуйида 14 декабр куни Украинанинг турли ҳудудларида олинган суратлар.

Озод этилган Чорнобайивкадаги кундалик ҳаёт

Чорнобайивка — Херсондан тахминан 11 километр ғарбда жойлашган посёлка. Россия қўшини бу аҳоли яшаш манзилига 27 феврал куни киришганди — бундан мақсад унинг яқинидаги «Херсон» аэродромини эгаллаш ва у ерга ҳарбий техникаларини жойлаштириш бўлган. Кейинги ойлар мобайнида Украина қуролли кучлари аэродром бўйлаб зарбалар берди ва РФ армияси қуролларини йўқ қилди. 11 ноябр куни, Россия Херсон областидан чекингач, Чорнобайивка Украина назоратига қайтди. Энди ушбу посёлка мэри Игор Дудар ва унинг жамоаси Чорнобайивкани нормал ҳаётга қайтариш устида ишламоқда. Қишлоқда тезда аҳоли учун ичимлик суви таъминоти тикланган, ёрдам кўрсатиш пунктлари очилган, бундай жойларда одамлар текинга озиқ-овқат ва энг зарур маҳсулотларни олиши мумкин. Бундан ташқари, Чорнобайивкада шикастланган электр тармоқлари ва вайрон қилинган уйлар ҳам фаоллик билан тикланмоқда.

Киевга дронлар ҳужуми

14 декабр куни Киевнинг Шевченково районида портлашлар содир бўлди. Украина пойтахти мэри Виталий Кличко ва шаҳар маъмурияти Украина қуролли кучлари Киев шаҳри ва Киев области устида эронликларнинг россиялик ҳарбийлар томонидан учирилган 13 та камикадзе дрон уриб туширилганини хабар қилди. Дронлар қулаши оқибатида Шевченково районида маъмурий бино тўртта хусусий турар жой биноси шикастланган.

Херсон ўққа тутилиши оқибатлари