Америка Қўшма Штатларининг мамлакатдаги фавқулодда ва мухтор элчиси Жонатан Ҳеникнинг Alter Ego лойиҳасига берган интервьюсида 2022 йилда туристик ва ишбилармонлик визаси сўраб мурожаат қилган ўзбекистонликларнинг 47 фоизига нима учун рад жавоби берилгани, АҚШга ноқонуний йўллар билан боришнинг оқибатлари, қайси турдаги визалар ушбу мамлакатда ишлаш ҳуқуқини бериши ҳақида сўз боради.
2022 йилда АҚШнинг Тошкентдаги элчихонаси ўзига мурожаат қилган Ўзбекистон фуқароларининг 47,04 фоизига B тоифали визалар (сайёҳлик ва ишбилармонлик визалари) беришни рад этган. Бу ҳақда АҚШ Давлат департаменти ҳисоботида айтилади. Бу кўрсаткич бўйича Ўзбекистон Марказий Осиё давлатлари ичида 2-ўринни эгаллаган, ҳатто Туркманистон фуқаролари ҳам ўзбекистонликлардан кўпроқ виза олишган.
“Мен визалар сонини қиёслашдан тийиламан, чунки бошқа давлат фуқароларига берилган визалар статистикасидан бехабарман. Сизга шуни айтишим мумкинки, 2022 йилда коронавирус пандемияси кузатилган йилларга нисбатан кўпроқ виза талабгорлари билан суҳбат ўтказдик ва 2019 йилдагига қараганда 2022 йилда анча кўп виза ажратдик.
Биласизки, пандемиядан кейин элчихонамиз айни пайтга келиб тўлиқ иш режимига қайтган ва ҳар қачонгидан кўпроқ одамларни суҳбатдан ўтказмоқдамиз. Виза талабгорлари ҳар қачонгидан ҳам кўпайиб боряпти ва бу ҳар йили кўпдан кўп одамлар – улар талаба бўладими ёки тадбиркор, бундан қатъи назар АҚШга интилаётганининг ижобий белгиси ҳисобланади. Биз манфаатларимиз йўлида имкон қадар кўпроқ алоқалар ўрнатган ҳолда Қўшма Штатларга имкониятларимиз даражасида кўпроқ саёҳат қилишни рағбатлантиришни истаймиз. Афсуски, виза талабгорларининг барчасига виза беришнинг иложи йўқ ва доим кимларгадир рад жавоби берилади.
Кимгадир виза берилган тақдирда ҳам биз ушбу шахс ҳақиқатан ҳам Қўшма Штатларга қонуний йўл билан борадими ёки, йўқ, буни билмаймиз. У ўз визаси муддатини узайтиришни сўраб мурожаат қилиши ҳам мумкин. Агар АҚШга борган шахс мамлакатда бўлиш ҳуқуқини берувчи виза муддатини узайтиришни сўраб мурожаат қилгудек бўлса, АҚШ ҳукуматидан бу ҳақда бизга хабар келиб тушади. Бу эса бизга ким Қўшма Штатларда қонуний асосда саёҳат қилаётганини, кимлар эса катта эҳтимол билан АҚШга ноқонуний фаолият учун бораётганини яхшироқ тушуниш имконини беради”, дея таъкидлаган элчи.
