Сифатсиз қурилган йўлнинг таъмирланиши якунланди – пойтахтдаги Аҳмад Дониш кўчаси очилди

Тошкент шаҳри Юнусобод тумани Аҳмад Дониш кўчасидаги автомобил йўли сифатсиз қурилгани, унда чўкишлар борлиги, давлатга 4,5 млрд сўм зарар етказилгани аввалроқ аниқланганди. Орадан 2 йил ўтиб, йўлнинг қайта таъмирланиши якунланди. Кўча аҳолига фойдаланишга топширилди.

Фото: Gazeta.uz

Юнусобод туманидаги “Туркистон” метро бекати устидан ўтган кўча таъмирланиб, фойдаланишга топширилди, йўлдан автомобиллар қатнамоқда. Бу ҳақда Gazeta.uz хабар қилди.

2021 йил май ойида Аҳмад Дониш кўчасидаги автомобил йўлининг 500 метр қисми 40-50 смгача чўкканди. Натижада йўлнинг бу қисмида транспорт воситаларининг ҳаракати вақтинча чекланган, президент ташрифидан кўп ўтмай янги фойдаланишга топширилган йўлда бу ҳолат юзага келгани кўплаб муҳокамаларга сабаб бўлганди.

Маълумот учун, 2020 йил ноябрь ойида Тошкент шаҳрининг жанубий ва шимолий қисмларини боғлаб турувчи асосий трасса – Аҳмад Дониш кўчасининг бир қисми таъмирталаблиги сабаб ёпилганди.

Кейинроқ, 2021 йил июн ойида Тошкент шаҳрининг собиқ бош имом-хатиби Раҳматуллоҳ Сайфуддинов (Саййид Раҳматуллоҳ Термизий) маърузаларидан бирида йўл қурилишига ажратиладиган маблағлар талон-торож қилиниши ҳақида гапирганди. Имом назарда тутган, 10 ойда 7-марта таъмирланаётган йўл Юнусобод туманидаги Аҳмад Дониш кўчасининг 556 метрлик қисми бўлиб чиққанди. Автомобил йўллари қўмитаси имом-хатибнинг ижтимоий тармоқларда тарқалган маърузасига раддия берилишини сўраганди.

2021 йил декабрь ойида эса Тошкент метрополитени линияларини қуриш дирекцияси ва Тошкент шаҳар ҳокимлиги Ягона буюртмачи хизмати инжиниринг компанияси мансабдорлари Аҳмад Дониш кўчасида автомобил йўлининг чўкишида айбдор деб топилиб, уларга нисбатан Жиноят кодексининг 207-моддаси 1-қисми, “Мансабга совуққонлик билан қараш” бўйича жиноят иши қўзғатилганди.