Бир кун олдин «Барселона» ва «Атлетико» амалга оширган камбэклар турнинг марказий учрашувида ҳам давом этди. «ПСЖ» биринчи бўлимда устунликка эришди, аммо ҳисобни оча олмади, 45-дақиқада Барколя билан комбинация уюштирган Ҳакими дарвозани ишғол этди, аммо ҳужум вақтида Мендеш офсайдда бўлгани туфайли гол инобатга олинмади.
Иккинчи бўлимда эса парижликлар уч дақиқа ичида икки гол ўтказиб юборишди. Бу мавсумда АПЛда ҳам, ЕЧЛда ҳам гол ура олмагани учун танқидлар остида қолган Жек Грилиш муносиб жавоб қайтарди. У аввалига ҳисобни очди, кейин Ҳоланд гол урган ҳужумда асосий ишни бажарди.
Аммо меҳмонларнинг қувончи узоққа чўзилмади. Етти дақиқадан кейин таблода иккита икки порлаб турарди. Брэдли Барколя — ушбу камбэк ҳомийси. У аввалига қанотдан олдинга юриб, жарима майдони марказидаги Усмон Дембелени голли пас билан таъминлади, кейин эса ўзи ўнг қанотда пайдо бўлиб, ҳисобни тенглаштирди. Кейин эса «Сити» ҳимояси сочилиб кетди — стандарт вазиятда кичик бўйли Мендеш ғалаба голини урди.
«ПСЖ» ажойиб ҳимояланди, яна икки бор дарвозани ишғол этди ва зарбалар сони бўйича «шаҳарликлар»ни катта фарқ билан ортда қолдирди – 26:9 (дарвоза соҳасига тўғри борган зарбалар бўйича – 9:6, жарима майдони ичидан йўлланган зарбалар сони бўйича – 16:7). Парижликларнинг кейинги икки голи офсайд ҳолати туфайли ҳакам томонидан бекор қилинди, аммо VAR қўшимча дақиқаларда Рамуш гол урган вазиятда тўп унга рақиб футболчисидан келганини кўрсатиб берди - 4:2.
Бу ғалаба эвазига парижликлар 22-ўринга кўтарилиб олди,
Гвардиола жамоаси плей-офф ҳудудини тарк этди! Сўнгги турда «Сити» уйда «Брюгге» билан ўйнайди, «ПСЖ» эса «Штутгарт» меҳмони бўлади. Аммо топ-24 га кириш учун икки жамоада ҳам имконият ёмон эмас.
Мавзуга оид
17 мин
2:0 ҳисобидаги устунликни бой берган «Сити» сўнгги тур олдидан 25-ўринга тушиб қолди, «Арсенал» ва «Интер» деярли 1/8 финалда, «Реал» камида 1/16 финал масаласини ҳал қилди. Чоршанба оқшомидаги асосий воқеалар, голлар ва ЕЧЛ жадвалидаги вазият.
Бошланғич таркибга киришининг ўзи билан Мбаппе Лионел Мессига тегишли бўлган рекордлардан бирини ўзиники қилди, у энди 26 ёшу 33 кунлигида Чемпионлар лигасида 80 учрашув ўтказган энг ёш футболчи. Ўйиннинг ўзи эса «Реал» учун кутилганидан кўра қийинроқ бошланди, «Залцбург» бош мураббийликка «Боҳум»нинг собиқ устози Томас Летч келганидан кейин ўзгара бошлаган, натижада биринчи бўлимнинг биринчи ярмида «Реал» рақиб дарвозасига зарба бера олмади. Австрияликлар жамоаси ўйинида баланс пайдо бўлган, аммо бу ўйинда савиядаги фарқ ўз сўзини айтди.
Даражадаги фарқ биринчи голли ҳужумда яққол кўриниб қолди, Винисиус Жуниор тўпни жарима майдонига узатди ва тўп Беллингҳем орқали бурчакка аниқ зарба йўллаган Родригога етиб борди. Бу паллада бразилиялик вингер асосий еврокубокдаги голлари сони бўйича «Қироллик клуби»нинг ўтмишдаги қаҳрамонлари — Амансио ва Сантиляна билан тенглашиб олди. Кўп ўтмай бундай голлари сонини 22 тага етказиб, уларни ортда ҳам қолдирди. Родригонинг ижроси ажойиб чиқди, аммо ҳужумдаги энг чиройли ҳаракат Беллингҳем тўпни товони билан ошириши бўлди.
Кейин эса голлар ёмғири дарвозабондан тўпни олиб қўйган Мбаппе ҳам ўз номини таблога ёздириб қўйиши ҳамда Винисиуснинг дубли билан давом этди. Бразилиялик ҳужумчининг зарбаларидан бири унинг учун «Реал» футболкасида урилган 100-голга айланди. Карло Анчелотти шогирдлари 1/16 учун йўлланмани кафолатлади, охирги турда «Брест» майдонида кучли саккизликка кириш имкони ҳам бўлади.
Янги йил арафасида Загребнинг «Динамо» клуби бошқарувига тайинланган Фабио Каннаваро дебютини ўта қийин баҳсда ўтказди, илк дақиқаларданоқ унинг жамоаси мағлубиятга маҳкум экани кўриниб қолди. Биринчидан, «Арсенал» хорватлар билан солиштирганда — бошқа галактика. Иккинчидан, «канонирлар» топ-8 йўлланмасини охирги турга қолдирмасликка бел боғлаганди. Ва лондонликларнинг илк ҳужумларидан бири Ҳаверц жарима майдони марказида бўш турган Райсга тўпни ташлаб бериши билан якунланди.
Англиялик ҳавбек учун бу асосий еврокубокдаги биринчи гол бўлди. Микел Артета жамоаси тўлиқ ташаббусга эгалик қилишда давом этган бўлса-да, бўлим охирига қадар ҳисоб ўзгармай қолди. Лекин иккинчи бўлимда барчаси кутилган сценарийда давом этди. Биринчи голда ҳам тўпни жарима майдонига етказиб берган Габриэл Мартинелли бу сафар Ҳаверцнинг бош билан урган голига ассистентлик қилди, охирги дақиқаларда эса Эдегор ҳисобни йирик кўринишга келтирди. Кейинги турда «Жирона»га қарши кечадиган сафар учрашуви «Арсенал» учун амалда қуруқ расмиятчиликка айланди.
Загребликлар эса топ-24 учун назарий жиҳатдан имконият сақлаб қолган, аммо йўлланмани қўлга киритиш жуда қийин бўлади. Охирги турда Каннаваро жамоаси уйда «Милан» билан ўйнайди.
«Милан» Чемпионлар лигасини икки мағлубият билан бошлаганди. Аммо бу сафар тўртинчи дақиқадаёқ жароҳат туфайли Эмерсон сафдан чиқиши «Милан» турнирда қаторасига бешинчи ғалабасига эришишига тўсқинлик қила олмади. Ўйин «Жирона» сценарийси бўйича кетиши ҳам мумкин эди, аммо Эрнандеснинг қулай вазиятда хато зарба беришига ван де Бек худди шундай ҳаракат билан жавоб қайтарди. Нидерландиялик яримҳимоячи дриблинг билан қулай вазиятга чиқиб борди, аммо Менянни алдай олмади. Шундан кейин россонерилар олов билан ўйнашишни бас қилишди ва Бинносир бўш ҳудудга етказиб берилган ажойиб паси билан Рафаэл Леауни ўйин қаҳрамонига айлантирди. Миланликларнинг португалиялик юлдузи бу мавсумни аввалгиларидек ёрқин ўтказмаётган бўлса-да, ЕЧЛда у олдинги уч турнирда урганига тенг голни (3) уриб бўлди.
Аммо унинг голи ғалаба учун етарли бўлмаслиги ҳам мумкин эди ва Ҳил айланма зарбаси билан олис бурчакни аниқ нишонга олди. Мезбонлар бахтига бу ҳужумда испанияликнинг бутсаси шериги узатма бераётганида офсайдда қолгани аниқланди. Қолган вақт давомида натижа ўзгармай қолди ва Сержиу Консейсау ўз жамоаси билан гуруҳ босқичини топ-8 да якунлаши мумкин. «Жирона» эса турнир билан хайрлашди.
Чоршанба оқшомида Миланнинг қора-кўк қисми ҳам байрам қилди. Прагада Лаутаро Мартинес ҳайратланарли гол муаллифи бўлди. Бастонининг узатмасидан кейин аргентиналик ҳужумчи ўткир бурчакдан туриб тўпни газонга чўпчитган ҳолда тўсин остига аниқ йўллади. Энди у 14 гол билан «Интер»нинг ЕЧЛдаги энг яхши тўпурари Адрианога тенглашиб олди. Гуруҳ босқичидаги етти ўйиндан олтитасида дарвозаси дахлсизлигини сақлаб қолган Симоне Индзаги жамоаси энди тўртинчи ўринда ва гуруҳ босқичини «Монако»га қарши уй учрашуви билан якунлайди. 29 январ куни бўлиб ўтадиган ўйинда бир очко ҳам мезбонлар кучли саккизликда қолишини кафолатлайди.
Ёмғирли Роттердамда «Бавария» ўйиннинг 80 фоиз вақтида тўпга эгалик қилди, 30 бор зарба йўллади, 13 марта бурчак зарбасини амалга оширди ва xG бўйича 2,70 кўрсаткичини қайд этди, аммо бирорта гол уролмади. «Фейеноорд»нинг эса учта зарбаси дарвоза соҳасига тўғри бориб, учаласи ҳам голга айланди. Аввалига Сантяго Ҳименес қарши ҳужумда ҳисобни очди, бўлимга қўшиб берилган дақиқаларда Дэйвис жароҳат олиб майдонни тарк этди, бир неча дақиқа ўтиб Ҳименес дублини нишонлади.
Танаффусдан кейин Венсан Компани жамоаси том маънода мезбонлар дарвозасини қамал қилди, аммо зарбалар ёки хато кетар, ёки кураж ушлаган дарвозабон Бейло матонат кўрсатарди. У еттита сейв амалга ошириб, ғалабада асосий ишни бажарди.
Some of the saves in Wednesday's #UCL games were UNREAL! 🤯
Сўнгги дақиқаларда эса Уэда ҳисобни йириклаштирди. «Бавария» Нидерландияда ҳеч қандай муаммога учрамайдигандек кўринганди, амалда эса оғриқли мағлубиятни қабул қилишга мажбур бўлди.
Натижада немислар кучли саккизликни тарк этиб, бирданига 15-ўринга қулади, «Фейеноорд» эса 11-ўринга кўтарилиб олди. Роттердамликлар плей-офф йўлланмасини нишонламоқда, «Бавария» эса охирги турда «Слован»ни мағлуб этиб, саккизликка қайтишга ҳаракат қилади.
Биринчи бўлимда «Селтик» омадсизлик оролига тушиб қолгандек эди. Мезбонлар шу вақтгача атиги бир очко тўплаган аутсайдерга босим уюштирди, аммо ҳакам Кёго Фуруҳасининг учта голини бекор қилди (иккитасида офсайд, учинчисида ҳужум вақтида МакГрегор томонидан фол қилингани қайд этилди). Кейин эса Арне Энгелс меҳмонлар дарвозасига белгиланган пеналтини ноаниқ ижро этди. Одатда бундай ҳолатда рақиб гол уриб кетади, аммо танаффусдан кейин Каспер Шмейҳел бир ҳужумнинг ўзида икки бор «Селтик»ни голдан қутқарди. 85-дақиқада эса шотландлар ниҳоят ўз мақсадига эришди — «Янг Бойз» футболчиси Лорис Бенито ўз дарвозасини ишғол этиб қўйди.
Бу ғалабадан кейин Брендан Роджерс жамоаси очколари сонини 12 тага етказиб, плей-офф йўлланмасини ҳал қилди. Унинг шогирдлари ҳозирда турнир жадвалида «Бенфика», «ПСЖ», «Спортинг» ва «Манчестер Сити» каби клублардан юқорироқда жойлашган.
«Лейпциг» ўтган турдаёқ плей-оффга чиқиш имкониятларини йўқотганди. Бу турда эса олти ўйинда 10 очко тўплаган «Спортинг» рақиб эди. Бу ўйинда мезбонларга ҳеч нарса керак эмас, меҳмонларга эса очко жуда зарур эди. Амалда эса немислар клуби ўз мухлислари учун ўйнаб, Чемпионлар лигасида олти учрашув давом этган мағлубиятли серияга барҳам берди. Иккинчи бўлимда майдонга тушган Виктор Дёкереш «Спортинг»ни қутқаришга ҳаракат қилди, аммо «Лейпциг» мураббийи ҳам ўйинчи алмаштиришда топқирлик қилди — клуб афсонаси Юссуф Поулсен тўп учун охиригача курашиб, уни дарвозага киритиб юборди. Қаторасига уч ўйинда ютқазган португаллар энди охирги турда ҳеч қандай мотивацияси йўқ бўлган «Болоня»ни енгиши талаб этилади.
«Брест» эса гуруҳ босқичини кучли саккизликда якунлаш имкониятларини кескин пасайтириб юборди. «Шахтёр» «Брест»ни таслим этиши учун бир бўлим етарли бўлди. Дастлабки турларда сенсация кўтарган французлар сўнгги уч турда иккинчи бор ютқазди. Энди жамоа 13 очко билан плей-оффга чиқади, аммо катта эҳтимол билан 1/8 финалда эмас, 1/16 финалда ўйнашига тўғри келади. Турнирдаги иккинчи ғалабасига эришган «Шахтёр» ҳам топ-24 учун имконият сақлаб қолган. Сўнгги турда украинлар клуби Дортмунднинг «Боруссия» клуби меҳмони бўлади.
Кун статистикаси
«ПСЖ» асосий еврокубокдаги уй учрашувларида қаторасига 8-марта биринчи бўлимда устунликка эриша олмади.
«Лейпциг» ҳужумчиси Поулсен ЕЧЛда 23 ўйин давом этган танаффусдан кейин гол урди.
Хосеп Гвардиола фаолиятида илк бор бир мавсумдаги 31 ўйинидан 10 тасида мағлубиятга учради.
«Манчестер Сити» ҳужумчиси Ҳоланд ЕЧЛдаги 51-голини урди. 26 ёшгача бўлган муддатда фақат Лионел Месси ундан кўпроқ гол урган (52).
«ПСЖ» Носир Ал-Ҳилайфи президентлиги даврида турнирда 66-ғалабасига эришди, бу кўрсаткич билан у «Лион»нинг афсонавий хўжайини Жан-Мишел Олласни ортда қолдирди.
Мбаппе ЕЧЛда 51-голини уриб, француз футболчилар орасида Тиерри Анрини ортда қолдирди.
