Зеленский оиласи 2024 йилда қанча даромад кўргани очиқланди

Украина президенти Володимир Зеленский оиласининг 2024 йилдаги умумий даромади 15 миллион 286 минг гривнани (тахминан 340 минг евро) ташкил этди, деб хабар беради Украина президенти офиси. Эълон қилинган солиқ декларациясига кўра, ушбу маблағларнинг ярмидан кўпи, яъни 8,5 миллион гривнадан ортиғини Зеленский оиласи давлат облигациялари тўловлари ҳисобига олган.

Қолган маблағлар президент маоши, банк фоизлари ва шахсий кўчмас мулкни ижарага беришдан олинган даромаддан шаклланган. «Давлат раҳбари оиласининг 2024 йил охиридаги пул маблағлари сезиларли даражада ўзгармаган. Ўтган йили Украина президенти оиласининг активлари, кўчмас мулклари ва транспорт воситаларида бошқа сезиларли ўзгаришлар бўлмаган», — дейилади хабарда.

2023 йилда Зеленский оиласининг даромади 12,4 миллион гривнани ташкил этган. Президент офиси маълумотига кўра, йиллик даромаднинг қарийб 3 миллион гривнага ошиши «ижара тўловларининг тўлиқ ҳажмда тиклангани» билан боғлиқ.

2020 йилдаги декларацияга кўра, Зеленский 815 минг доллар даромад топган, ўшанда унинг маоши 336 минг гривна бўлган. 2019 йилда унинг оиласи даромади 1,06 миллион долларни ташкил этган.

2024 йил октябрда Forbes журнали энг кўп маош оладиган давлат раҳбарларини эълон қилганди. Маълумотларга кўра, биринчи ўринни йилига 1,56 миллион евро билан Сингапур бош вазири Лоуренс Вонг эгаллаган. Иккинчи ва учинчи ўринларни эса Швейцария президенти Виола Амерд (525 минг евро) ва Австралия бош вазири Энтони Албаниз (380 минг евро) банд этган. АҚШнинг ўша вақтдаги президенти Жо Байден 400 минг доллар билан тўртинчи ўринни эгаллаганди.

Россия президенти Владимир Путин Forbes рўйхатида 28-ўринни эгаллаган — унинг йиллик маоши расман 10,2 миллион долларни ташкил этади (бу ойига 10 минг евродан ҳам кам демак).