Трамп: Россия иқтисодиёти «тўсатдан қулаши» мумкин

АҚШ президенти Доналд Трамп 14 октябр, сешанба куни Оқ уйда журналистлар билан суҳбатда Россия президенти Владимир Путиндан Украинада давом этаётган уруш туфайли ҳафсаласи пир бўлганини яна бир бор таъкидлади ва мамлакатда «бензин учун катта навбатлар» юзага келганини маълум қилди. Матбуот анжумани акс этган видеоёзув президент маъмуриятининг YouTubeʼдаги каналида эълон қилинди.

«Мен ҳафсалам пир бўлди, чунки Владимир билан муносабатларимиз жуда яхши эди ва ҳозир ҳам шундай бўлса керак. У бу урушни ҳал қилиши керак. Биласизми, ҳозир Россияда одамлар бензин учун узун навбатларда турибди. Ва тўсатдан унинг иқтисодиёти қулаши мумкин», — деди Трамп.

АҚШ президенти россиялик ҳамкасби унга «жуда салбий таъсир кўрсатган» урушни нима учун давом эттираётганини «билмаслигини» таъкидлади: «У тўрт йиллик урушни бир ҳафта ичида якунлаши керак эди. У 1,5 миллион аскарини йўқотди». Трампнинг фикрича, можаронинг давом этиши Путинни «жуда ёмон кўринишда» кўрсатяпти. «У буни тугатиши мумкин эди. У буни тезда тугатиши мумкин эди», деб қўшимча қилди Америка раҳбари.

АҚШ президенти 17 октябр куни Вашингтонга келадиган Украина президенти Володимир Зеленский билан бўлажак учрашувини ҳам эслатиб ўтди. «Жума куни президент келади. Ва мен у нима дейишини биламан. У қуролга эга бўлишни хоҳлайди. У Tomahawk'га эга бўлишни хоҳлайди. Бизда Tomahawk кўп. Сизга Аргентинада Tomahawk'лар керак эмасми?» - дея Трамп матбуот анжуманида иштирок этган Аргентина президенти Хавер Милейга юзланиб, ҳазил қилди.