Экология учун махсус комиссия ва нон ёпиш орқали саратонга қарши кураш – маҳаллий дайжест

Кун давомида Kun.uz ёритган муҳим маҳаллий янгиликлар билан таништирамиз.

{Yii::t(}

Ўтказиб юбориш 6s

Ўтказиб юбориш

Тошкентда экологик вазиятни яхшилаш учун махсус комиссия тузилди

Президент Шавкат Мирзиёев фармонига мувофиқ, Тошкент шаҳрида экологик вазиятни яхшилаш юзасидан кечиктириб бўлмайдиган чора-тадбирларни амалга ошириш бўйича махсус комиссия тузилди.

Унинг зиммасига пойтахтда ҳаво сифати, яшил ҳудудларни асраш ва кўпайтириш, транспортдан чиқадиган зарарли моддаларни камайтириш, саноат корхоналари фаолиятида экологик талабларга риоя этилишини кучайтириш каби йўналишларда аниқ чора-тадбирлар ишлаб чиқиш ва уларнинг ижросини мувофиқлаштириш вазифалари юклатилиши кутилмоқда.

Махсус комиссия атмосфера ҳавоси сифатига салбий таъсир қилувчи моддалар ёққан иссиқхоналар ва бошқа объектлар фаолиятини вақтинча тўхтатиши ёки тугатиши мумкин.

Тошкентда эски автомобилларни trade-in орқали янгилаш тизими жорий этилади

Президентнинг Тошкент шаҳри экологиясини яхшилашга қаратилган фармонига мувофиқ, пойтахтда атмосфера ҳавосини ифлослантиришни камайтириш мақсадида 2010 йилгача ишлаб чиқарилган, экологик талабларга тўлиқ жавоб бермайдиган автомобилларни trade-in орқали янгилаш механизми жорий этилади.

Ушбу механизм орқали эски автомобиллар эгаларига уларни янгироқ, экологик жиҳатдан хавфсизроқ транспорт воситаларига алмаштириш учун қулай шарт-шароитлар яратилиши, бу эса ўз навбатида пойтахт ҳавосининг ифлосланишини сезиларли даражада камайтиришга хизмат қилиши кутилмоқда.

Барча масжидларда ёмғир сўраб, «истисқо» намози ўқилади

Ўзбекистонда куз фасли ёмғирсиз ўтаётгани, келгуси кунларда ҳам ёғингарчилик кутилмаётгани туфайли муфтий ташаббуси билан, 28 ноябрь куни жума намозидан кейин — Ўзбекистондаги барча масжидларда ёмғир сўраб, жамоат билан икки ракаат истисқо намози ўқилади.

Бундан ташқари, вилоятлар, туман-шаҳарлар марказий масжидлари ва зиёратгоҳларда жонлиқ сўйилиб, ёрдамга муҳтож оилалар ва бошқа эҳтиёжмандларга тарқатилади.

Бундан ташқари, Умра зиёратида бўлиб турган имом-домлаларга Икки Ҳарамда ҳам ўз гуруҳлари иштирокида истисқо намозини ўқишлари тавсия этилган.

Зойир Мирзаев аёлларнинг тандирда нон ёпмай қўйганини танқид қилди

Тошкент вилояти ҳокими Зойир Мирзаев аёллар тандирда нон ёпмай қўйгани сабабли онкологик касалликлар кўпайганини айтди. «Тандирда нон ёпган аёлда рак касали бўлмайди», деди у. Ҳокимнинг тушунтиришича, тандир олдида организм қизийди, натижада «қон тез айланади ва томирларни тозалайди».

Унинг сўзларига кўра, Самарқандда ишлаганида кореялик доктор келиб, аёлларда саратоннинг кўпайиш сабабларини таҳлил қилган.

«Нимага кўпайяпти, бу саратон касаллиги? 7-8 та нарсани ёзган. Камҳаракатлик биринчи ўринда турибди. Тўртинчи фактор — тандирда нон ёпмаслик деганди. Тандирда нон ёпган аёлда рак касали бўлмайди. Сабаби тандирнинг олдига борганда организм қизийди, кейин қон икки баробар тез айланаркан организмда. Шунинг тезлигида қон томирларни тозалаб ташларкан. Қон ифлос бўлса, қайсидир безга микроб қўшилиб, секин-секин безлар уйғонади-ку. Бу факторлардан биттаси-да. Шуни йўқотдик-да бизлар», деди Мирзаев.

Маиший ҳаво тозалагичлар бождан озод этилади

Ўзбекистонга тадбиркорлик субъектлари ва фуқаролар томонидан олиб кириладиган маиший ҳаво тозалаш ускуналари божхона божидан озод этилади. Бу президентнинг Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисидаги фармонида белгиланган.

Фармонда атмосфера ҳавосининг РМ2.5 зарралари билан ифлосланиш манбаларини аниқлаш учун Экология қўмитаси ҳузурида Атмосфера ҳавосини чуқур ўрганишга қаратилган махсус лаборатория ташкил қилиниши белгиланган.

Шунингдек, тадбиркорлик субъектлари ва фуқаролар томонидан маиший ҳаво тозалаш ускуналари Ўзбекистон ҳудудига олиб кирилганда божхона божидан озод этилади. Маълумот учун, ҳаво тозалагичлар импорти учун 20 фоиз, лекин ҳар бир донаси учун 3 доллардан кам бўлмаган миқдорда импорт бож ўрнатилган.