Трамп РФнинг Путин қароргоҳига зарба берилгани ҳақидаги баёнотига ишонмаяпти

АҚШ президенти Доналд Трамп декабр охирида Новгород вилоятидаги РФ президенти Владимир Путин резиденциясига Украина Қуролли кучлари гўёки ҳужум қилишга урингани ҳақида Москва томонидан айтилган баёнотларга ишонмаслигини билдирди. Бу ҳақда Америка етакчиси якшанба, 4 январ куни президент самолёти бортида ОАВ вакиллари билан суҳбатда айтиб ўтди.

Президент пулидаги журналистлардан бири Трампга савол берар экан, у Украинанинг Путин резиденциясига зарба бергани ҳақидаги хабарлардан “жуда ғазаблангани”ни эслади. “Мен бу зарба берилганига ишонмайман”, — дея журналист сўзини бўлди Трамп.

Президент нима учун ҳужумдан сўнг дарҳол шундай руҳда фикр билдиргани ҳақидаги аниқлаштирувчи саволга Трамп шундай жавоб берди: “Чунки ўша пайтда ҳеч ким (ҳеч нарсани — таҳр.) билмасди. Бу ҳақда мен биринчи марта эшитган нарса шу эди. У (Путин — таҳр.) уйимга ҳужум қилинди, деди. Биз маълумотни текширганимизда бунга ишонмадик, лекин ўшанда бу ҳақда умуман биринчи бор эшитганимиз шу эди”.

Шу брифингнинг ўзида АҚШ президентидан Россиянинг Украинага қарши уруши тўхтатилиши учун ҳозир қандайдир муддат (дедлайн) белгиланган-белгиланмагани ҳақида сўрашди. Трамп охирги муҳлат йўқлигини, бироқ у можаро тезроқ якунланишига умид қилишини айтди.

Шундан кейин Трамп маъмуриятида Москвага қарши янги санкциялар жорий этиш имконияти муҳокама қилиняптими, деган савол берилгач, президент сўзни самолёт бортида бўлган сенатор Линдси Грэмга берди. “Биз буни ҳар куни муҳокама қиламиз… Айтиб бермайсанми?” — деди Трамп Грэмга мурожаат қилиб.

Республикачи сенатор ўз навбатида, унинг режасига кўра, Украинада тинчлик “Путиннинг мижозлари”га нисбатан “божлар таҳдиди” остида таъминланишини билдирди. Грэм октябрда Трамп РФнинг нефт гигантларига қарши санкциялар жорий этганини, аммо Москвада ҳали ҳам “85 та ҳомий” қолганини эслатди. АҚШ сиёсий доираларида бир неча ойдан бери муҳокама қилинаётган қонун Трампга Россия нефтини сотиб оладиган мамлакатлар маҳсулотларига 500 фоизгача божлар жорий этиш имконини бериши керак.

Грэмнинг фикрича, Трамп божлар жорий этганидан кейин Ҳиндистоннинг РФдан нефт харидини камайтиргани мисоли “бу ишлайди” деган хулосани кўрсатади. Трамп сенатор сўзларига қўшилиб, Россия иқтисодиёти ҳозир ёмон аҳволда эканини айтди.

Украина гўёки Путин резиденциясига ҳужум қилишга урингани ҳақидаги РФ баёнотлари Украина президенти Володимир Зеленский АҚШга ташриф билан келган ва у ерда Трамп билан Украина бўйича тинчлик режасини муҳокама қилаётган пайтда янграган. “Улар қандайдир резиденция ҳужумга учради деб баёнот қилиб, шунчаки (Украина — таҳр.) пойтахтига ва давлат биноларига зарба бериш учун замин тайёрлаяпти”, — деди Зеленский. У Москва тинчлик музокараларидаги илгарилашга халал бермоқчи эканини таъкидлади.

РФ баёнотлари тўлқинидан бир неча кун ўтгач, Доналд Трамп Truth Social ижтимоий тармоғида New York Post газетасининг “Путиннинг ‘ҳужум’ атрофидаги шов-шуви тинчликка айнан РФ тўсқинлик қилаётганини кўрсатади” сарлавҳали мақоласини жойлаштирди.

1 январ куни РФ Мудофаа вазирлиги идора ихтиёрида Владимир Путиннинг Валдайдаги резиденциясига ҳужумда гўёки қатнашган украин дронларидан бирининг контроллери борлигини билдирди. Идора бу контроллерни АҚШга топширган, аммо Трампнинг сўнгги баёнотларидан келиб чиқса, Москва айтганларига нисбатан унинг фикрига бу таъсир қилмаган.