Ўзбекистоннинг Исроилдаги элчихонаси ватандошларни огоҳлантирди

Ўзбекистоннинг Исроилдаги элчихонаси ушбу мамлакатда бўлиб турган ватандошларга огоҳлантириш билан чиқди.

Элчихонанинг билдиришича, Исроил ҳудудида хавфсизлик масалалари бўйича Фронт орти буйруғи томонидан махсус огоҳлантиришлар берилади.

Элчихона ватандошлардан расмий кўрсатмаларга қатъий амал қилишни сўраган.

“Қизил рангдаги огоҳлантириш – бу хавфли вазиятни англатади. Бундай пайтда сиз:

 • Яқиндаги ҳимояланган жой (бомбоубежище/мамат) ёнида бўлишингиз лозим;

 • Ҳаракатланишни чеклашингиз зарур;

 • Сирена эшитилганда, зудлик билан ҳимояланган жойга киринг ва янги огоҳлантириш берилгунга қадар шу ерда қолинг.

Кўк рангдаги огоҳлантириш – хавф ўтганини ва ҳимояланган жойни тарк этиш мумкинлигини билдириш учун берилади. Бошпаналар ёнида қолиш шарт эмас”, дейилади элчихона хабарида.

28 феврал куни Исроил ва АҚШ кучлари Эронга ҳарбий ҳужум уюштирди. Ўз навбатида, Эрон ҳам Исроилга ва АҚШнинг Яқин Шарқ мамлакатларида жойлашган ҳарбий базаларига жавоб зарбалари йўллади.