Трамп Эрон билан катта уруш бошланганини эълон қилди

АҚШ президенти Доналд Трамп Америка ҳарбийлари Эронга қарши «катта жанговар операциялар»ни бошлаганини эълон қилди. У Truth Socialʼда 8 дақиқалик видеомурожаатини жойлаштирди.

АҚШ Эронга қарши катта ҳарбий амалиёт бошлади. Бизнинг мақсадимиз – АҚШ ва бутун дунёга Эрондаги режим томонидан бўлаётган таҳдидларни бартараф этишдир.

47 йил мобайнида Эрон режими «Америкага ўлим!» дея ҳайқирди. Унинг тарихи [1979 йилда] Теҳрондаги АҚШ элчихонасида ўнлаб америкаликларни гаровга олишдан бошланганди. Бу режим 1983 йилда Байрутда Америка тинчликпарвар кучларига қарши теракт учун, 2000 йилда «Коул» эсминеци бортида рўй берган берган портлаш учун, 2023 йил 7 октябрида Ҳамаснинг Исроилга ҳужуми учун ва бошқа кўплаб ёвузликлар учун масъулдир. Биз бунга ортиқ тоқат қилмоқчи эмасмиз.

Бу режим ядро қуролини қўлга киритмаслиги керак. Шунинг учун ўтган йили биз унинг ядровий объектларини бомбалагандик. Биз улар билан келишишга кўп бор уриндик. Аммо улар ўз ядро дастурини ривожлантиришда ва аллақачон Европагача етиб борадиган, кейинроқ АҚШга ҳам етиб бориши мумкин бўлган ракеталарини ишлаб чиқаришда давом этишди. Биз бунга йўл қўя олмаймиз.

Биз уларнинг ракета дастурини йўқ қиламиз. Биз уларнинг флотини йўқ қиламиз. Биз Эрон прокси кучлари томонидан янги терактлар уюштирилишига йўл қўймаймиз.

Биз йўқотишларга учрашимиз мумкин. Аммо биз буни келажак учун қиляпмиз.

Ислом инқилоби муҳофизлари корпуси аъзолари, Эрон армияси ва полициячилар: қуролларни ташланг ва амнистияга эга бўлинг, акс ҳолда сизни муқаррар ўлим кутади.

Эрон халқига: сиз эркин бўладиган вақт келди. Бошпаналарда қолинг. Биз тугатганимизда эса ҳокимиятни ўз қўлингизга олинг.

Теҳронда портлашлар

Эрон давлат оммавий ахборот воситалари Теҳрон марказида учта портлаш овози эшитилгани ва қалин тутун кўтарилганини хабар қилди. Эрон пойтахтининг шарқий ва ғарбий қисмларидаги айрим ҳудудларда мобил алоқа линиялари ўчирилган, интернет уланиши эса кучсизлашган ва беқарор ишлаяпти.

Fars агентлиги Эроннинг Исфаҳон, Қум, Караж ва Керманшоҳ шаҳарларида ҳам портлашлар бўлганини хабар қилмоқда.

AP агентлиги маълумотига кўра, Исроил зарбасининг нишонларидан бири Эрон олий раҳбари оятуллоҳ Али Хоманаийнинг офиси бўлган. Шу билан бирга, Reuters агентлигига кўра, Эрон ҳукумати вакили Хоманаий “хавфсиз жойга кўчирилгани”ни ва у ҳозир Теҳронда эмаслигини айтган.

Бу орада, Reuters гувоҳларига таяниб хабар беришича, Теҳронда ёнилғи қуйиш шохобчалари олдида узун навбатлар пайдо бўлган, кўплаб одамлар шаҳарни тарк этмоқда.

Эроннинг Mehr агентлиги эса ҳужум остида разведка биноси ва президентлик мажмуаси, шунингдек Теҳрон аэропорти ҳам бўлганини хабар қилди.

Жавоб зарбалари кутилмоқда

Исроилда аҳолини Эроннинг эҳтимолий жавоб зарбасидан огоҳлантириш учун ҳаво тревогаси эълон қилинди, деб хабар қилди Исроил мудофаа армияси (ЦАҲАЛ). Исроил ҳаво ҳудуди фуқаролик авиацияси учун ёпилди.

Исроил армияси, шунингдек, мамлакат “алоҳида режим”га ўтаётганини билдирди: мактаблар ва университетлар ёпилади, оммавий тадбирлар бекор қилинади, корхоналарнинг аксарияти ишини тўхтатади. Фақат ўта муҳим хизматлар ишлашда давом этади.

АҚШнинг Қатардаги элчихонаси ўзининг бутун ходимлари учун “жойида паноҳланиш” (shelter-in-place) режими жорий қилди ва АҚШ фуқароларига ҳам кейинги кўрсатмаларга қадар худди шундай қилишни тавсия этди.