Эрон Қатар ва Баҳрайндаги АҚШ ҳарбий базаларига зарба берди

Эрон муҳофизлар корпуси АҚШ-Исроилнинг зарбаларига жавобан ракета ва дронлардан иборат тўлқинли ҳужум бошлаганини маълум қилди. Шундан сўнг Баҳрайн АҚШ Ҳарбий-денгиз кучларининг Бешинчи флоти хизмат кўрсатиш маркази ракета ҳужумига учради. Қатар Мудофаа вазирлиги эса ўз ҳудудига қаратилган «бир нечта ҳужумлар»ни бартараф этган.

Эрон Ислом Инқилоби Қўриқчилари Корпуси АҚШ-Исроилнинг зарбаларига жавобан ракета ва дронлардан иборат тўлқинли қарши ҳужум бошлаганини маълум қилди.

28 февраль куни Баҳрайндаги АҚШ Бешинчи флоти биноларидан бирига ракета ҳужумидан кейин. Фото: REUTERS/Stringer

Эроннинг ярим расмий FARS ахборот агентлиги хабар беришича, эронликлар томонидан амалга оширилган ракета ҳужумлари минтақадаги АҚШ ҳарбий базаларини нишонга олган. Хабарда айтилишича, ҳужумлар Қатардаги Ал-Удейд авиабазаси, Кувайтдаги Али Ал-Салем авиабазаси, БААдаги Ал-Дафра авиабазаси ҳамда Баҳрайнда жойлашган АҚШ Бешинчи флоти қароргоҳини қамраб олган.

Шу билан бирга, Баҳрайн давлат ахборот агентлиги АҚШ Ҳарбий-денгиз кучларининг Бешинчи флоти хизмат кўрсатиш маркази ракета ҳужумига учраганини хабар қилди.

Баҳрайн пойтахтидаги ҳарбий-денгиз базаси жойлашган Жуффайр туманидаги бир нечта гувоҳлар кучли портлаш овозини эшитганини билдирган.

Қатар Мудофаа вазирлиги эса ўз ҳудудига қаратилган «бир нечта ҳужумларни муваффақиятли бартараф этганини» маълум қилди. Ўтган йил июнь ойида ҳам Эрон ўтган ёздаги ядровий объектларига қилинган АҚШ бомбардимонларига жавобан Доҳа яқинидаги Америка ҳарбий базасига ракета учирганди.

Исроил ҳарбийлари эса Эроннинг ҳарбий мақсадли объектларига кенг кўламли зарбалар берганини билдирди. Ҳарбий операция мамлакат ғарбий қисмидаги бир қатор ҳарбий иншоотлар, шу жумладан ҳарбий базалар ва стратегик жиҳатдан муҳим объектларга ҳаво ҳужумлари билан бошқарилган зарбалар берилган.

Сабереэн ахборот агентлигига кўра, АҚШ томонидан амалга оширилган тўртта зарба Эронга етиб бормаган – Ироқ пойтахти Бағдоднинг жануби-ғарбидаги ҳудудга тушган. Бу ҳудуд эса Эрон билан иттифоқчи бўлган Ироқдаги энг қудратли қуролли тузилмалардан бири — «Катаиб Ҳизбуллоҳ» гуруҳи томонидан фойдаланиб келинган.