17 октябр куни Тошкентдаги Brasserie Park ресторани ходимининг курьерга нисбатан қўпол муносабати жамоатчилик муҳокамаларига сабаб бўлди. Курьер бу ерда пиёдалар йўлагидан ўтган. Йўлак эса ресторан томонидан ноқонуний тарзда эгаллаб олинган.
«Хоҳласанг битта шапалоқ ҳам қўйиб юбораман. Хоҳлайсанми? Телефон билан қўрқитаман деб ўйлаяпсанми? Фаросатни ишлат, мияни ишлатсанг бўлади-ку, бу ерда одамлар овқатланиб ўтиришибди. Сен эса скутерда келяпсан. Сенга ғалати бўлмайдими? Саволимга жавоб бер, мен тилимга жавоб бераман сўкканимга.
Тушиб келиш керак, қанақа қилиб рестораннинг ўртасидан ўтиб келасан-у, кўрмайсан! Кўр бўлиш керак бу учун! Ҳа, психман! Яна саволинг борми? Бўлди, яхшиликча кет, мен сени «спокойно» қўйиб юбораётганимда, ҳозир бутунлигингча кетаётганингда. … ейсан! Тушундингми?» деган ходим курьерга қарата.
Атрофдагилар воқеани тасвирга олаётган курьерни жим кетишга ундашган. Видеони ижтимоий тармоқда тарқатиш «терпилалик» эканлигини айтишган.
Пиёдалар йўлагидан фойдаланиш талабларининг бузилиши ва ҳолат юзасидан Brasserie маъмурияти изоҳ беришни истамади. Воқеа иштирокчиси бўлган курьер Мунир Якубов воқеага гувоҳ бўлганлар ҳам унинг ёнини олишмаганини айтди:
«Ресторандан буюртмани олиб ярим йўлга етганимда мени тўхтатишди. У ердан ўтиш мумкин экан, кетаётгандим, бир киши сўкиб кетди. Агар хушмуомалалик билан тушунтирганда индамасдан кетган бўлардим.
Кейин бирор ёнимни оладиган одам келармикин десам, курьерлар одам эмас экан-да. Ёнимизда турган одамлар ҳам унинг ёнини олишди. Мени сўкаётган одамга ҳеч ким «бу ёш бола, унақа сўкиб ташлама. Сениям боланг бор», демади. Одамлардан хафа бўлиб кетдим. Ҳеч ким ёнимни олмади.
Биз одамлар юрадиган жойдан юришга мажбурмиз. Чунки йўлга чиқиш учун права керак. Биз электр велосипедда юрамиз 25 тезликда. Одамлар курьерларни одамдай ҳис қилишмаяпти», дейди у.
Бу воқеадан кейин Тошкент шаҳар ҳокимлиги текширув ўтказди. Унда ҳудуддан фойдаланиш талаблари, жумладан пиёдаларнинг эркин ҳаракатланишини таъминлаш қоидалари бузилгани аниқланган. Шундан сўнг рестораннинг ёзги майдончаси олиб ташланиб йўлак қонунчилик талабларига мувофиқлаштирилган. Айтиш керакки, йўлак пиёдалар учун ерости ўтиш йўлига уланиб кетган.
Мазкур можаро бўйича ресторан вакилига нисбатан ҳам чора кўрилди. Жиноят ишлари бўйича Миробод туман судининг қарори билан унга 5 сутка маъмурий қамоқ жазоси тайинланди.
