Тошкент шаҳар ИИББ маълумотига кўра, воқеа 17 октябр куни тахминан соат 13:00 да содир бўлган. Ресторан олдида 1990 йилда туғилган С.Р. ва 2009 йилда туғилган вояга етмаган йигит ўртасида келишмовчилик юзага келган.
ОАВ хабарларида йигит курер бўлиб ишлаши, жанжал эса Марказий универмаг — ЦУМ яқинидаги пиёдалар йўлагидан скутерда ўтиш вақтида бошлангани айтилган. Тарқалган видеода ресторан вакили уни тўхтатиб, ҳақорат қилгани ва уриш билан таҳдид қилгани акс этган. Курер эса навигатор кўрсатган йўналиш бўйича келганини билдирган.
ИИББ фуқаронинг ҳаракатларида жамоат тартибини бузиш ҳолати бўлганини маълум қилган. Миробод тумани ИИО ФМБ томонидан Маъмурий жавобгарлик тўғрисидаги кодекснинг 183-моддаси — «Майда безорилик» бўйича баённома расмийлаштирилиб, тўпланган ҳужжатлар жиноят ишлари бўйича туман судига юборилган.
Воқеадан кейин «Мовий гумбазлар» хиёбонидаги ёзги майдонча жойлашуви ҳам текширилган. Ҳокимлик маълумотига кўра, ҳудуддан фойдаланиш талаблари, жумладан, пиёдаларнинг эркин ҳаракатланишига оид қоидабузарликлар аниқланган. Шундан сўнг чоралар кўрилиб, йўлак ресторан стол-стулларидан бўшатилган.
Ресторан маъмурияти ўз муносабатида ёзги майдонча ёнидаги йўлак пиёдалар, болалар аравачаси билан юрувчилар ва ҳаракатланиш имконияти чекланган шахслар учун очиқлигини билдирган. Айни пайтда, ходимлар йўлакда мотоцикл ва мопедларда ҳаракатланмасликни сўрашини қайд этган.
Ресторан жанжал ҳолатларини ва кузатув камералари ёзувларини ўрганаётганини, ходимларнинг қўполлиги ҳамда таҳдидларига йўл қўймаслигини ҳам маълум қилган.
Кейинчалик жанжалда қатнашган шахс курердан узр сўраб, қилган ишидан пушаймонлигини билдирган.
