«Lester»ning bir qator futbolchilari jamoa hujumchisi Jyeymi Vardi bilan gaplashgan va uni jamoada qolishga undagan.
Bundan oldinroq, Vardi Londonning «Arsenal» jamoasiga o‘tish arafasida ekani xabar qilindi. Bu xabarni Angliyaning amaldagi chempionlari ustozi Klaudio Raneri ham tasdiqladi.
Vardi 6 iyun kuni londonliklar jamoasida tibbiy ko‘rikdan o‘tib, shartnomaga imzo chekishi kutilayotgandi. Ammo bu ro‘y bermadi va futbolchi terma jamoa bilan Fransiyaga, Yevropa chempionatida ishtirok etish uchun jo‘nab ketdi.
The Telegraph xabariga ko‘ra, Vardi bilan «Lester»ning Kasper Shmeyxel, Ues Morgan va Robert Hut kabi yetakchilari gaplashgan va uni jamoadan ketmaslikka chaqirgan.
«Arsenal» Vardi uchun 20 million funt to‘lab, unga 4 yil davomida 24 million funt miqdorida maosh bermoqchi.
Yakunlangan mavsumda 29 yoshli Jyeymi Vardi «Lester» uchun APLda 36 uchrashuvda maydonga tushib, 24 gol muallifi bo‘ldi va 8 marta golli pas uzatdi.
«Arsenal» Vardidan tashqari, «Lester»ning boshqa yetakchilari, Riyoz Mahrez va Ngolo Kanteni ham o‘z safiga qo‘shib olishga harakat qilmoqda.