"Kanonirlar" barcha muxlislarga klub kimning evaziga o‘z tarixidagi eng ahamiyatli yutuqlarga erishganini eslatib qo‘yishga qaror qildi.
Bu inson – klub murabbiyi Arsen Vengerdir.
Venger "Arsenal"ga 1996 yildan murabbiylik qila boshlagan va klubda o‘tkazilgan yillar bo‘yicha rekordchi bo‘ldi hamda kanonirlar tarixida eng muvaffaqiyatli bosh murabbiyga aylandi.
Fransiyalik mutaxassis klubni uch marotaba Angliya Premer-ligasida chempionlikka olib kelgan, 6 marta Angliya kubogi va yana shuncha marta Angliya superkubogini yutgan.
Bundan tashqari, Venger jahon futboliga Terri Anri boshchiligidagi ko‘plab yulduzlarni tuhfa qilgan.
20 yillik bunday muvaffaqiyatli faoliyatdan keyin "Arsenal" o‘zining bosh murabbiyiga hurmat bajo keltirishni va muxlislar klubning bunday yutuqlari uchun kimga minnatdor bo‘lishlari kerakligini eslatib qo‘yishga qaror qildi.
"Arsenal" vakillari Venger haqida ajoyib videorolik ishlab, uni YouTube’da kanonirlar kanalida joylashtirishdi.
Videoda klubning oxirgi 20 yil ichida eng esda qoluvchi voqealari va yorqin g‘alabalari, jumladan klub birorta ham mag‘lubiyatga uchramagan holda APLda chempion bo‘lgan 2003-2004 yillardagi mavsumdan olingan lavhalar keltirilgan.
Bu natija hali ham noyob natija hisoblanadi, chunki kanonirlardan boshqa hech qaysi klub bunday natijaga erisha olmagan.
Venger Angliya futbolida chin ma'noda inqilob qila oldi. Uning jamoasi o‘yin uslubi uzoq yillardan beri hech kimni befarq qoldirmay kelmoqda, fransuzning mashg‘ulotlar va futbolchilarni tayyorlashga yondashuvi esa deyarli murabbiylik ishidagi etalon hisoblanadi.
manba:tribuna.uz
