Dastlab uzoqroq tanishining muammosini hal qilib berishni va'da qilgan Sojida uning 200 AQSh dollarini qo‘lga kiritib, “jig‘ildon”iga urib yuboradi. Keyingi safar esa singlisining o‘g‘lini ishga olib kirib qo‘yaman deb 1500 AQSh dollarini o‘zlashtiradi. 2011 yilda qop-qop va'da bilan qo‘lga kiritilgan pulni qaytarish u yoqda tursin, ishga kiritishni ham turli bahonalar bilan besh yil davomida ortga surib kelaverar edi. Bu haqda “Huquq” nashri yozmoqda.
Uning o‘g‘li Shavkat Eshboyev ham onasidan saboq olib, uning hunarini davom ettiradi. Uylanish taraddudiga tushgan Shavkatning bir bosh qo‘yni uyga yetaklab kelganini ko‘rgan ona uni yana o‘sha cho‘ponning yoniga jo‘natadi. Chunki Shavkat Fathulla ismli cho‘ponni o‘zini unga boy ko‘rsatib, osongina “to‘ri”ga ilintirgan edi. Niyati nopok onaning harakatlari zoye ketmadi. Shavkat sodda cho‘ponning yana ikki bosh qo‘chqorini uyiga yetaklab kelib, sotib yubordi. 2 million 800 ming so‘mga baholangan qo‘ylarning puli to‘y o‘tganidan keyin qaytarilishi kerak edi. Ammo ular bunday qilishmaydi.
Ona va o‘g‘ilning qilmishlari yuzasidan jinoiy ish qo‘zg‘atilib, sudda ko‘rib chiqildi va firibgarlarga qonuniy jazo tayinlandi.
