OAV: Vladimir Klichkoning keyingi raqibi rossiyalik bokschi bo‘lishi mumkin

39 yoshli rossiyalik bokschi Aleksandr Ustinov joriy yil dekabrida ukrainalik sobiq jahon chempioni Vladimir Klichko bilan jang o‘tkazishi mumkin. Ayni vaqtda Klichko jamoasi 10 dekabrda bo‘lishi kerak bo‘lgan jang uchun raqib qidirmoqda. 

Dastlab Klichko britaniyalik Tayson Fyuri bilan revansh jang o‘tkazishi kerak edi. Biroq bu jang Fyurining tayyor emasligi sababli yo‘qqa chiqqan. Shundan keyin Klichkoga qarshi Fyurining o‘rniga Entoni Joshua jang qilishi haqida xabar paydo bo‘lgan. Biroq keyin bu jang ham bo‘lmasligi haqida xabar qilingan. Endi esa boxingscene.com ma'lumotlariga ko‘ra, avstraliyalik Lukas Braun bilan muzokaralar ketmoqda. Shu bilan bir vaqtda rossiyalik bokschi nomzodi ham qaralmoqda. Ustinov WBA reytingida Klichkodan keyin 3-o‘rinda turibdi.

Kuzda Ustinov kubalik Luis Ortisga qarshi jang o‘tkazishni rejalashtirgandi, biroq jang bo‘lmagan. Ustinov ayni vaqtda 34 ta jangdan 33 ta g‘alabaga erishgan va bitta mag‘lubiyatga uchragan. Klichko esa 68 ta jangdan 64 tasida g‘olib bo‘lgan, 4 tasida esa mag‘lubiyat nashidasini tortgan.