Janubiy Koreya bosh murabbiyi O‘zbekistonning himoya chizig‘idagi salohiyatini yuqori baholadi

Bugun Seulda Janubiy Koreya terma jamoasi bosh murabbiyi Uli Shtilike o‘yinoldi matbuot anjumanida ishtirok etdi. U o‘z so‘zida 15 noyabr kungi raqib bo‘lmish O‘zbekiston terma jamoasining imkoniyatlari haqidagi fikrlarini bildirib o‘tgan.

“Ertangi o‘yin juda muhimligini siz aytmasangiz ham yaxshi anglab turibman. JCh saralashidagi o‘rin uchun kurash bo‘ladi. O‘zbekiston ertangi o‘yin natijasiga ko‘ra guruhda o‘z o‘rnini mustahkamlashga urinsa, biz 2-o‘rinni o‘zimizniki qilishga harakat qilamiz. Bu o‘yinga ko‘p narsa “tikilgan”, deya so‘z boshlagan germaniyalik murabbiy.

Uning aytishicha, “Kristal Pelas” yarim himoyachisi Li Chong Yong ertangi o‘yinda maydonga tushmasligi oydinlashgan.

Shuningdek, mutaxassis o‘zining terma jamoa rulidagi muvaffaqiyatsiz davri haqidagi savolga javob qaytargan.

“2 yillik boshqaruvim davomida bunday holat kuzatilmagandi. JCh saralash bosqichida shunaqasi ham bo‘lib turadi. Shogirdlarim bilan bu haqda gaplashib olganman. Kanada bilan o‘yindagi muvaffaqiyat bizda o‘zimizga bo‘lgan ishonchni qaytardi. Ertaga ham shu ruhda davom etamiz deb o‘ylayman”, — degan u. 

Uli Shtilike bo‘lg‘usi raqib O‘zbekiston terma jamoasi o‘yini va bu jamoaning imkoniyatlari haqidagi fikrlarini bildirib o‘tgan.

“Bu terma jamoaning nafaqat JCh saralashidagi 4ta o‘yinini, balki Iordaniya bilan o‘tkazgan o‘rtoqlik o‘yinini ham ko‘rib chiqdim. Ularda yirik g‘alaba ham, yirik mag‘lubiyat ham yo‘q. 5ta o‘yin davomida atigi 1ta gol o‘tkazib yuborishgani ularda himoya chizig‘i mustahkamligini anglatib turibdi. Eronga qarshi o‘yinda o‘tkazilgan gol ham standart vaziyat orqali kelib chiqqan. Biz Kanada bilan o‘yindagidek harakat qilishimiz lozim. Hujum va himoya chizig‘i hamohangligi O‘zbekistonni mag‘lub etishimizga yaxshi omil bo‘ladi”, degan murabbiy.