Rossiya aviakompaniyalaridan yana biri O‘zbekistonga parvozlarni yo‘lga qo‘yadi

2016 yil dekabridan Rossiyaning «Yamal» aviakompaniyasi Podmoskovedagi yangi barpo etilgan Jukovskiy xalqaro aeroportidan Markaziy Osiyoning uch mamlakatiga doimiy parvozlarni yo‘lga qo‘yadi. Bu haqda TASS agentligi xabar qilmoqda.

«Biz parvoz hududini kengaytirmoqdamiz. Yangi yo‘nalishlarni o‘zlashtirayapmiz. Dekabr oyidayoq samolyotlarimiz Jukovskiy aeroportidan havoga ko‘tariladi. Biz anchagina konservativ kompaniya bo‘lganimiz sababli, bosqichma-bosqich rivojlanmoqdamiz. Jukovskiydan yaqin xorij mamlakatlari – O‘zbekiston, Tojikiston va Qozog‘istonga havo qatnovlarini amalga oshiramiz. Keyinchalik, Isroil va yakuniy bosqichda Yevropa», – degan aviakompaniya bosh direktori Vasiliy Kryuk. Uning so‘zlariga ko‘ra, hozirda, so‘nggi kelishuvlar jarayoni yakunlanmoqda. 

Avgust oyida aviakompaniya Jukovskiy aeroportidan xalqaro parvozlar, xususan Vena, Budapesht, Myunxen, Plovdiv, Praga va Tbilisi, Qozog‘iston, Qirg‘iziston (O‘sh va Bishkek), Tojikiston (Dushanbe va Xo‘jand)ga aviareyslarni amalga oshirish uchun Rosaviatsiya boshqarmasining ruxsatini olgan edi. 

«Yamal» aviakompaniyasi Rossiya hududida 60 dan ortiq yo‘nalish bo‘yicha yo‘lovchilarni tashish bilan shug‘ullanadi. Bundan tashqari, yaqin va uzoq xorijga parvozlarni amalga oshiradi. Kompaniya parkida «Airbus A-320» va «Airbus A-321», «SRJ-200», «Boeing-737», «L-410», «CL-600» va «Sukhoi SuperJet-100» samolyotlari bor.