O‘zbekiston yangi saylangan prezidenti Shavkat Mirziyoyev, saylov natijalari e'lon qilinganidan keyin O‘zekspomarkaz pavilonlarining birida to‘plangan O‘zLiDeP faollari oldida so‘zga chiqdi.
U o‘z nutqida O‘zbekiston xalqiga saylovdagi faol ishtirok uchun minnatdorchilik bildirgan.
"Assalomu alaykum aziz vatandoshlar, qadrli saylovchilar, hurmatli do‘stlar!
Albatta, mana shunday sizlarning olqishlaringiz, ko‘tarinki ruhlaringiz har qanday odamga kuch, qudrat, g‘urur beradi. Bu natija – sizning natijangiz.
Vatanga sadoqat va muhabbati, kelajak avlodlar oldidagi mas'uliyati naqadar balandligini ko‘rsatgan oq ko‘ngilli xalqimga o‘zimning cheksiz minnatdorchiligimni izhor qilmoqchiman.
Bugungi natija, mening zimmamga yuklatilgan javobgarlikni yuz baravar, ming karra orttirishini — men to‘g‘ri tushunaman. Menga bildirilgan juda katta ishonch uchun — ona xalqimga ta'zim qilaman.
Mana shu mard va fidoyi, oliyjanob xalqim uchun to‘plangan bilim va tajribam, butun vujudim va borlig‘imni bag‘ishlab, kechayu-kunduz ishlashga tayyorman", — dedi O‘zbekiston yangi saylangan prezidenti Shavkat Mirziyoyev.
