AQSh Kongressi a'zosi: Rossiyaga nisbatan sanksiyalarni yanada kuchaytirish kerak

AQSh Kongressining vakillar palatasi a'zosi Adam Shiff (Kaliforniya shtatidan demokrat)ning fikricha, amerika ma'muriyati tomonidan Rossiyaga nisbatan kiritilgan sanksiyalar yetarli emas va qo‘shimcha cheklov choralarini qo‘llash lozim. U bu haqda ABC telekompaniyasiga bergan  intervyusida aytib o‘tgan.

"Biz yanada ko‘proq narsani qilish kerak, degan fikrdamiz, - dedi Kongress quyi palatasidagi razvedka bo‘yicha qo‘mita a'zosi sanaluvchi Shiff. – To‘g‘risini aytsam, biz (Kongressda) qabul qilingan choralar Rossiyani bosib turishda yetarli emas, deb hisoblaymiz hamda kelajakda sanksiyalar yanada kuchaytirilishi mumkin. Buni har ikki partiya ham qo‘llab-quvvatlashiga guvoh bo‘lasiz".

Shiffning ta'kidlashicha, AQShning saylangan prezidenti Donald Tramp Barak Obama ma'muriyati tomonidan Moskvaga nisbatan kiritilgan sanksiyalarni bekor qilishga qaror qilsa, u Kongressning “keskin reaksiyasi”ga duch keladi. Shiffning so‘zlariga ko‘ra, bunday holatda ko‘plab demokrat va respublikachilar Rossiyaga qarshi “jiddiy sanksiyalar paketi”ni qo‘llash uchun harakat qilishadi.

Avvalroq, amaldagi AQSh ma'muriyati rasmiy vakillari maxsus tashkil etilgan brifingda Tramp inauguratsiyadan so‘ng Rossiyaga qarshi sanksiyalarni qiyinchiliksiz bekor qilishi mumkinligini tan olishgandi. 

Ma'lumot uchun, AQSh 29 dekabr kuni bir qator Rossiya kompaniyalari, Federal xavfsizlik xizmati va mamlakat Qurolli kuchlari bosh shtabi bosh boshqarmasiga nisbatan sanksiyalar kiritilishi haqida ma'lum qildi. Shuningdek, Amerika hukumati 35 nafar rossiyalik diplomatni mamlakatdan chiqarib yubordi. Vashington bu qadamlarni amerika siyosiy tashkilotlariga uyushtirilgan xakerlik hujumlari bilan bog‘lagan. Amaldagi ma'muriyat bunda Rossiyani ayblamoqda.

Moskva esa kiberhujumlarga aloqasi yo‘qligini bir necha bora ma'lum qilgan. Rossiya prezidentining matbuot kotibi Dmitriy Peskov yangi sanksiyalarga izoh berarkan, ular “tajovuzkorlikdan darak berishi”ni ta'kidlab o‘tdi.