Eron havo hududining Rossiya jangovar samolyotlari tomonidan ishlatilishi davom etmoqda. Bu haqda Eron milliy xavfsizlik oliy kengashi kotibi Ali Shamhoniy Fars news agency’ga ma'lum qildi.
"Eron va Rossiyaning Suriyada terrorchilik bilan kurashdagi o‘zaro harakati ko‘p tomonlama bo‘lib, strategik xarakterga ega. Agarda vaziyat talab etsa, istalgan vaqtda Rossiya samolyotlari tomonidan Suriyadagi yer usti amaliyotlariga ko‘mak berish maqsadida Eron havo hududini kesib o‘tish haqida qaror qabul qilinishi mumkin. Bu vaziyatga bog‘liq", - deya ta'kidlab o‘tdi Shamhoniy. Uning qo‘shimcha qilishicha, so‘nggi vaqtlarda Rossiya samolyotlarida Eronda yoqilg‘i quydirishga ehtiyoj bo‘lmagan.
O‘tgan yilning avgustida Rossiya harbiylari Eron harbiy-havo kuchlarining Hamadondagi Shohid Noj bazasidan Suriyadagi jangarilarga zarbalar berish maqsadida foydalangandi. Eron mudofaa vaziri Husayn Dehqon esa noyabr oyida Tehron Rossiyaning bu harbiy bazasini ishlatish borasidagi iltimosini ko‘rib chiqishga tayyorligini ma'lum qildi. Biroq bu borada muzokaralar hozirgacha olib borilmadi.
