Rossiya Turkiya NATO a'zosi bo‘lishiga qaramay, unga S-400 tizimlarini yetkazib berishdan cho‘chimaydi. Bu haqda Rossiya prezidentining harbiy-texnik hamkorlik bo‘yicha yordamchisi Vladimir Kojin ma'lum qildi. Uning aytishicha, Turkiya ushbu havo hujumiga qarshi mudofaa tizimlariga katta qiziqish bildirib, muzokaralar olib bormoqda.
"Ha, Turkiya NATO a'zosi. Biroq biz bundan cho‘chimaymiz. Nima uchun cho‘chimaymiz? Birinchidan, biz nimanidir yetkazib berishdan avval intellektual faoliyat natijalarini qat'iy tartibga solamiz va har bir davlat sotib olayotgan quroli bilan nima qilishi mumkinligi va nima qila olmasligi bo‘yicha majburiyatlarni o‘z bo‘yniga oladi", deb aytdi Kojin.
"Ikkinchidan, sotilayotgan narsa – bugungi kundir", deb qo‘shimcha qildi Kojin.
Kojinning aytishicha, Rossiya armiyasi yanada mutlaq yangi qurol – yangi fizik tamoyillarga asoslangan S-500 tizimlari bilan jihozlanadi.
Turkiyaga S-400 tizimlarini yetkazib berish masalasi Moskvada Rossiya va Turkiya prezidentlari o‘rtasida muhokama qilingandi.
S-400 tizimlarining birinchi xorijiy buyurtmachisi Xitoy sanaladi. Xitoy bilan tizimlarning yetkazib berilishi bo‘yicha shartnoma imzolangani 2015 yil martida e'lon qilingan. OAV ma'lumotlariga ko‘ra, bitimning umumiy qiymati 3 mlrd dollarni tashkil qilgan. 2016 yil oktabrda ushbu tizimlarni Hindistonga yetkazib berish bo‘yicha kelishuv imzolangan.
