Rossiya va AQSh munosabatlaridagi muammolarni hal qilish uchun ishchi guruh yaratiladi 

AQSh davlat kotibi Reks Tillerson Rossiya va AQSh munosabatlaridagi eng murakkab muammolarni hal qilish bo‘yicha Rossiya-AQSh ishchi guruhi yaratilishini tasdiqladi.   

"Hammamiz uchun muhim hisoblangan hamda eng uzoq davom etuvchi va murakkab masalalarni hal qilish bo‘yicha ishchi guruh yaratishga kelishib oldik", deb Rossiya tashqi ishlar vaziri Sergey Lavrov bilan muzokaralar natijalariga ko‘ra aytdi Tillerson.  

"Biz davlatlarimiz o‘rtasida ishonchni tiklash va munosabatlarning yomonlashishini to‘xtatish uchun barcha ishni qilishimiz kerak", deb qo‘shimcha qildi Tillerson.

Uning aytishicha, Vashington va Moskva harbiy va diplomatik kanallar bo‘yicha aloqalarni saqlab qolishi kerak.

Suriyadagi vaziyat

Tilersonning aytishicha, Moskva va Vashington birlashgan va barqaror, terrorchilar boshpana topa olmaydigan Suriyani qo‘llab-quvvatlashlarini aytganlar. 

AQSh davlat kotibining aytishicha, tomonlarning fikrlari mos tushmayotgan mavzu Suriyada kimyoviy qurolning qo‘llanishi masalasi bo‘lib turibdi.

"Ayonki, bu fikrlarimiz mos kelmaydigan mavzudir, chunki Rossiya obektiv tergov o‘tkazilishini talab qilmoqda", deb aytdi Tillerson.

Rossiyaga qarshi sanksiyalar

Tillersonning aytishicha, Ukraina sababli Rossiyaga qarshi kiritilgan sanksiyalar Lavrov bilan muhokama qilinmagan.  

"Biz sanksiyalar maqomini o‘zgartirish masalasini muhokama qilmadik", deb aytgan Tillerson.

Koreya yarim orolidagi vaziyat

Tillersonning ta'kidlashicha, Rossiya va AQSh Shimoliy Koreyani yadroviy qurolsizlantirishga rozilar.

Tillerson, shuningdek, AQSh flotining Koreya yarimoroli yaqinida manyovrlar olib borayotganiga izoh berdi. Uning aytishicha, manyovrlar avvaldan rejalashtirilgan va hech qanday harbiy maqsadni ko‘zlamaydi. "AQSh harbiy-dengiz kuchlarining zarba beruvchi guruhi, xususan Carl Vinson aviatashuvchi kemasi Tinch okeanida qolmoqda, uning Koreya yarimoroli yaqinida harakatlanishi harbiylarimiz tomonidan rejalashtirilgan. Ularda u yerda hech qanday muayyan maqsad yo‘q", deb aytgan AQSh davlat kotibi.