Yangi qaror: Xorazmga yanada ko‘proq sayyohlar keladi va Xiva brendi ishlab chiqiladi

O‘zbekiston Respublikasi Prezidenti Shavkat Mirziyoyev «2017−2021 yillarda Xiva shahri va Xorazm viloyati sayyohlik salohiyatini kompleks rivojlantirish Dasturi to‘g‘risida"gi qarorni imzoladi. 

Hujjat Xiva hamda Xorazm viloyati turistik salohiyatini yanada rivojlantirish va undan samarali foydalanishni oshirish, sayyohlarning Xiva shahri noyob tarixiy-madaniy va me'morchilik merosi bilan yanada keng tanishishi uchun ijobiy sharoit yaratishni maksimal darajada ta'minlash, mintaqa zamonaviy turistik infratuzilmasining rivojlanishini tezlashtirish va taqdim etilayotgan turistik, mehmonxona va transport xizmatlari sifatini takomillashtirish, ichki sayyohlikni faollashtirish, turistik soha uchun kadrlar tayyorlashni yaxshilash, shuningdek, yangi ish o‘rinlarini yaratish va viloyati aholisi daromadining ortishini rag‘batlantirish maqsadida qabul qilindi.

Qaror bilan «2017−2021 yillarda Xiva shahri va Xorazm viloyati sayyohlik salohiyatini kompleks rivojlantirish Dasturi" tasdiqlandi. Unda respublikaning asosiy sayyohlik markazlarini bog‘lovchi temir yo‘l tarmog‘ini qurish, xorijiy mamlakatlardan charter reyslarini yo‘lga qo‘yish hamda muntazam reyslarni ko‘paytirish, Urganch-Xiva yo‘nalishida qulay sayyohlik avtobuslari qatnovini tashkil etish kabilar ko‘zda tutilgan.

Ichki turizmni rivojlantirish maqsadida Samarqand-Urganch, Buxoro-Urganch va Farg‘ona-Urganch aviareyslarini ochish ham mo‘ljallangan.

Bundan tashqari, 2017−2021 yillarda turistik xizmatlar eksporti hajmini 2,3 barobarga, sayyohlar sonni esa 2,1 barobargacha oshirish rejalashtirilgan.

Tegishli vazirlik va idoralarga hamda joylardagi mahalliy hokimiyat organlariga “Ichan qal'a” majmuasi ichi va atrofida restavratsiya ishlarini bajarishni nazarda tutgan Xivani batafsil loyihalashtirish dasturini ishlab chiqish vazifasi topshirildi.

Shuningdek, Xiva shahri va Xorazm viloyatiga turistlar oqimini oshirish bo‘yicha tegishli tashkiliy-amaliy chora-tadbirlarni qabul qilish, shu maqsadda Xiva shahri brendini ishlab chiqishni ko‘zda tutish, 2017-2021 yillarda keng reklama kampaniyasini tashkil qilish va o‘tkazish vazifasi ham yuklatildi.