“O‘zbektelekom” optik tolali kabellarni ishlab chiqaradi

BMTning “elektron hukumat” rivojlanishi bo‘yicha jahon mamlakatlari reytingida telekommunikatsiya infratuzilmasi va uning tarkibiga muhim me'yor sifatida qaraladi. Jumladan, har 100 kishiga internet ulushi, telefon aloqasi ulushi, har 100 kishiga to‘g‘ri keladigan mobil abonentlar soni, keng polosali simli va simsiz internet foydalanuvchilari soni muhim ko‘rsatkichlar hisoblanadi. 

Garchi, so‘nggi vaqtlarda, O‘zbekiston hududlarida 20 ming kilometrdan ziyod optik tolali aloqa liniyasi yotqizilgan bo‘lsa ham, afsuski, bugungi kunda keng polosali simli internetga ulanish ko‘rsatkichi mamlakatimizda har 100 nafar foydalanuvchiga 1.33 kishini tashkil qilmoqda. Bu esa reytingda O‘zbekistonning o‘rniga jiddiy ta'sir etgan. 

Keng polosali internetni joriy qilish optik tolali aloqa kabellariga bo‘lgan ehtiyojni oshirmoqda. Xususan, hisob-kitoblarga ko‘ra, 2021 yilga qadar O‘zbekistonda optik tolali aloqa kabellariga bo‘lgan ehtiyoj 277 ming kilometrni tashkil qiladi. Shuni inobatga olib, O‘zbekiston Axborot texnologiyalari va kommunikatsiyalarini rivojlantirish vazirligi tomonidan respublikada optik tolali aloqa kabeli ishlab chiqarishga ixtisoslashgan korxona faoliyatini yo‘lga qo‘yish taklifi ilgari surilgan va davlat rahbariyati tomonidan ijobiy qarshilangan. 

“O‘zbektelekom” AJ bosh direktori Shuhrat Qodirovning Xalqaro Press-klubning navbatdagi sessiyasida ma'lum qilishicha, bugungi kunda ushbu masalani hal etish uchun Toshkentning Chilonzor tumanidagi sobiq “Rele-avtomatika” zavodi binosida yangi ishlab chiqarish korxonasi tashkil etiladi. Unda yiliga 50 ming km ilg‘or aloqa kabeli ishlab chiqariladi. Import o‘rnini bosuvchi va eksportga yo‘naltirilgan mahsulot ishlab chiqarilishi bilan 150 mln dollar miqdoridagi mablag‘ tejaladi.