OAV: Tramp shtabi rossiyalik amaldorlar bilan 18 marta aloqaga chiqqan

Reyter agentligining nomi oshkor etilmagan amerikalik sobiq va hozirda xizmat qilayotgan amaldorlarga asosan xabar berishicha, AQSh prezidenti Donald Trampning saylovoldi shtabi a'zolari Qo‘shma Shtatlardagi saylovoldi poygasining so‘nggi yetti oyi davomida rossiyalik amaldorlar bilan aloqada bo‘lgan.

"2016 yilning aprelidan noyabriga qadar o‘n sakkizta qo‘ng‘iroq va elektron xabar yuborilgan", - deya yozadi agentlik.

Manbalar so‘zlariga ko‘ra, aloqalar davomida Rossiyaga qarshi sanksiyalar kiritilganidan so‘ng ikki davlat o‘rtasidagi murakkab iqtisodiy munosabatlar, IShID terrorchilik guruhi bilan kurash va “Xitoyni bosib turish” muhokama qilingan.

Ayni damda FQB va AQSh kongressi tergovchilari bu aloqalarni AQShdagi prezidentlik saylovlarga "Rossiya aralashuvi" bo‘yicha surishtiruv doirasida tekshirishmoqda. Manbalarning aytishicha, hozirga qadar bu holat bo‘yicha qonunbuzarliklar yoki fitna borasida dalil-isbot aniqlanmagan.

Amaldorlar so‘zlariga ko‘ra, bu aloqalarning oltitasi – Rossiyaning Vashingtondagi elchisi Sergey Kislyak va Tramp maslahatchilari o‘rtasidagi telefon qo‘ng‘iroqlaridir. Ular orasida AQSh prezidentining milliy xavfsizlik bo‘yicha sobiq yordamchisi Maykl Flinn ham bor. Shu bilan birga, Flinn va Kislyak o‘rtasidagi muloqot 2016 yilning 8 noyabr kungi saylovlardan so‘ng ko‘p bora ro‘y bergan. Manbalar ma'lumotiga ko‘ra, ular go‘yoki AQSh milliy xavfsizligi byurokratik apparatini chetlab o‘tishi mumkin  bo‘lgan hamda Tramp va Rossiya prezidenti Vladimir Putinga o‘zaro muloqot uchun yopiq kanal yaratish masalasini muhokama etishgan. 

Shuningdek, agentlik ma'lumotiga ko‘ra, yana 12 ta qo‘ng‘iroq, elektron yoki matnli xabar saylovoldi kampaniyasi davomida Tramp maslahatchilari va rossiyalik amaldorlar yoki RF prezidentiga yaqin, deya hisoblanuvchi shaxslar o‘rtasida amalga oshgan. Suhbatlar chog‘ida ikki davlat o‘rtasida umumiy iqtisodiy va boshqa manfaatlarga katta e'tibor qaratgan holda kelishuvlar imzolash mavzusi ko‘tarilgan.