Shahrisabzda tibbiyot kolleji direktori o‘rinbosari o‘qishga kiritib qo‘yish uchun pora so‘radi

Kollej direktorining ma'naviy-ma'rifiy ishlar bo‘yicha o‘rinbosari vazifasini vaqtincha bajarib turgan Elmurod Nuraliyevning og‘zini ko‘pirtirib bergan va'dalari Jarqin Rahmonovani o‘ylantirib qo‘ydi. Ayni qabul arafasida Shahrisabz tibbiyot kollejiga kelgan qarshilik bu ayolning jiyani Jamshid o‘qish uchun shu kollejga hujjat topshirmoqchi edi. E.Nuraliyev unga abituriyentlarni tayyorlashini, yotoq joyi xarajati 300 ming so‘m bo‘lishini, o‘qishga kiritib qo‘yishi uchun esa 1000 AQSh dollari uzatishi lozimligini aytdi, deb yozadi “Huquq” gazetasi.

Tibbiyot xodimlari tayyorlanadigan qutlug‘ dargohda o‘qituvchi degan nomni ko‘tarib yurgan mutasaddi odamdan bu g‘alati taklifni eshitgan J.Rahmonova avvaliga hayron bo‘ldi. Uning bozorda ko‘tarasiga kartoshka sotayotganday bemalol o‘z “xizmat”iga narx qo‘yishi ayolning g‘ashiga tegdi. Shunday bo‘lsa-da, sir boy bermay, “bozorchi” domla bilan “savdolashdi”.

-  Salgina kamaytiring...

-  Yo‘q, kam bo‘lmaydi, - cho‘rt kesdi domla. – Men ham kimlargadir berishim kerak...

Ayol nihoyat bir qarorga keldi.

Oradan ikki haftacha o‘tib, domlaga qo‘ng‘iroq qildi-da, aytgani tayyorlab qo‘yilganini xabar qildi. Domla unga jiyani bilan o‘zi yashaydigan Qorasuv qishlog‘iga kelishni tayinladi.

Qishloqdagi choyxona yonida uchrashishdi. “Muzokara” qisqa bo‘ldi. Domla ayolga jiyanidan xavotir olmasligini aytib, yotoqxonaga joylashtirish uchun Jamshidning ko‘rpa-to‘shaklarini o‘zining “Matiz”iga ortdi. J.Rahmonovadan olgan 2 mln. 300 ming so‘m pulni qora paketga solib, orqa o‘rindiqqa tashladi. Ammo mashinaga o‘tirishga ulgurmadi. Mashina yonida paydo bo‘lgan SVOJJDLQK departamenti xodimlari o‘zlarini tanishtirib, pullarni tegishli tartibda rasmiylashtirib olishdi.

Jinoyat ishlari bo‘yicha Shahrisabz tumani sudining hukmiga ko‘ra, Elmurod Nuraliyevga oylik ish haqining 20 foizi davlat daromadiga ushlab qolgan holda 1 yil axloq tuzatish ishi jazosi tayinlandi. Unga bag‘rikenglik ko‘rsatilib, amnistiya haqidagi qaror sharofati bilan tayinlangan jazodan ozod qilindi.