Samarqand viloyati tumanlaridan biridagi elektr ta’minoti korxonasi rahbari mahalliy tadbirkorga tegishli umumiy ovqatlanish shoxobchasining elektr tarmog‘iga o‘zboshimchalik bilan ulangani oqibatida davlatga yetkazilgan 393 million so‘mlik zarar bo‘yicha jinoiy javobgarlikka torttirmaslikni va’da qilgan. U zarar miqdorini kamaytirib ko‘rsatgan holda ishni ma’muriy tartibda sudga chiqarib berish evaziga 5 ming AQSh dollari talab qilgan.
Mansabdor shaxs joriy yil iyul oyi oxirida ushbu mablag‘ning 4 ming AQSh dollarini olgan. Keyinchalik tadbirkordan qolgan 1 ming dollarni ham tezroq berishini so‘ragan.
Davlat xavfsizlik xizmati va Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda u qolgan 1 ming AQSh dollarini uchinchi shaxs orqali olgan vaqtida ushlandi. Qayd etilishicha, mazkur rahbar muqaddam sudlangan bo‘lgan.
Shuningdek, Toshkent shahrida 1988-yilda tug‘ilgan, muqaddam sudlangan shaxs o‘zining yuqori lavozimda ishlovchi tanishlari orqali 2001-yilda tug‘ilgan fuqaroni Toshkent davlat iqtisodiyot universitetiga o‘qishga kiritib qo‘yishni va’da qilgan. Buning evaziga u 20 ming AQSh dollari talab qilgan.
Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda gumonlanuvchi oldindan 13 ming AQSh dollarini olgan vaqtida ashyoviy dalillar bilan ushlandi.
Hozirda har ikki holat yuzasidan jinoyat ishlari qo‘zg‘atilib, tergov harakatlari davom etmoqda.
