Foto: Reuters
IShID terrorchilik guruhi Afg‘oniston poytaxti Kobul shahrida sodir etilgan terakt uchun javobgarlikni o‘z zimmasiga oldi.
Poytaxtning prezidentlik saroyi va xorijiy elchixonalar joylashgan tumanda xudkush tomonidan sodir etilgan terakt oqibatida 90 kishi halok bo‘ldi, 380 nafarga yaqin kishi jarohatlandi.
Qurbonlar orasida Bi-bi-si telekanali xodimi, Tolo TV telekanali jurnalisti, shuningdek, Germaniya elchixonasi qo‘riqchilari ham bor. Shuningdek, Eronning Afg‘onistondagi elchisi, Yaponiya elchixonasining ikki xodimi, Misr elchixonasi soqchisi va jurnalistlar jarohatlangan.
Dastlabki ma'lumotlarga ko‘ra, Eron elchixonasidan 100 metr masofada portlovchi qurilmalar o‘rnatilgan, suv tashishga mo‘ljallangan avtosisterna portlatilgan.
