Maktab direktori ta'tilda gadjyetlardan voz kechgan o‘quvchilarga 100 dollardan to‘lashga va'da berdi

Vashingtondagi xususiy maktab direktori Diana Smit hech bo‘lmasa har seshanba kuni turli elektronika vositalari – smartfonlar, planshetlar, televizorlar, kompyuterlardan voz kechgan 7- va 8-sinf o‘quvchilariga o‘z cho‘ntagidan 100 dollardan mablag‘ to‘lashga va'da berdi. Keyingi o‘quv yilining boshiga qadar davom etadigan bunday noodatiy aksiya haqida The Washington Post gazetasi xabar tarqatdi.

Smitning aytishicha, maktab o‘quvchilari kun davomida televizor, smartfonlar yoki kompyuter o‘yinlariga tikilib o‘tirishlaridan xavfsiramoqda. Uning so‘zlariga ko‘ra, ular shu tufayli sog‘ligida turli muammolarga ham duch kelishi mumkin.

Ta'kidlanishicha, ushbu ayol direktorlik qiluvchi maktabda smartfonlarni darslar paytida ishlatish butunlay taqiqlangan.

May oxirida Smit o‘z taklifi haqida o‘quvchilarning ota-onalariga so‘zlab berdi, ular bunday tashabbusni qo‘llab-quvvatlashdi. Maktab o‘quvchilari ham bunday tarzda pul ishlab olishga qarshi emas. Ular 100 dollardan olishlari uchun 11 ta seshanbani telefonlar, kompyuterlar, planshetlar, videoo‘yinlar va TVsiz o‘tkazishi kerak.