NATO Afg‘onistonda 2017 yildan so‘ng ham qoladi va o‘z pozitsiyasini yanada mustahkamlaydi

NATO Afg‘onistonda 2017 yildan so‘ng ham qoladi va o‘z harbiy kuchlarini yanada mustahkamlaydi. Bu haqda Shimoliy Atlantika alyansi bosh kotibi Yyens Stoltenberg payshanba kuni NATO mudofaa vazirlarining Afg‘oniston bo‘yicha yig‘ilishi yakunida ma'lum qildi.

"Biz “Qat'iy qo‘llab-quvvatlov” missiyamizni 2017 yildan so‘ng davom ettiramiz. Bugun shuni tasdiqlashim mumkinki, u yerdagi harbiy kuchlarimizni ham mustahkamlaymiz", - dedi u. Ta'kidlanishicha, NATOning 15 davlati Afg‘onistondagi missiyaga o‘z hissasini yanada oshirish bo‘yicha majburiyat oldi. "Shuningdek, Afg‘oniston xavfsizlik kuchlarini moliyalashtirishni 2020 yilgacha davom ettiramiz", - deya qo‘shimcha qilib o‘tdi Stoltenberg.

Uning so‘zlariga ko‘ra, bu bo‘linmalar sifat jihatidan yangi darajaga o‘tishi lozim. "Aynan shuning uchun missiyamiz doirasida afg‘on maxsus topshiriqli otryadlari sonini ikki barobarga oshirish niyatidamiz. Biz Afg‘onistonga yangi samolyotlar taqdim etamiz va uchuvchilarni tayyorlaymiz. Shuning uchun harbiy akademiyalardagi joylarni kadrlar tayyorlash maqsadida ko‘paytirmoqdamiz", - deya ta'kidlab o‘tdi Stoltenberg.

Alyans bosh kotibi so‘zlariga ko‘ra, Ukraina NATOning Afg‘onistondagi missiyasini qo‘llab-quvvatlashda davom etishga va'da bergan.

"Ukraina mudofaa vaziri yig‘ilishda ishtirok etdi. U Ukraina Afg‘oniston va bizning ushbu davlatdagi amaliyotimizni qo‘llab-quvvatlashini tasdiqladi", - dedi u.

Bosh kotib so‘zlariga ko‘ra, Ukraina Afg‘oniston uchun qo‘shimcha kuch va mablag‘ tashkil etish bo‘yicha anjumanda qatnashadi. "Barcha davlatlar bo‘yicha ma'lumot bera olmayman, biroq Ukrainaga bizning Afg‘onistondagi missiyamizga hissa qo‘shgani uchun minnatdormiz", - deya ta'kidlab o‘tdi Stoltenberg.