Erdo‘g‘an Turkiyada qamoqqa olingan yuzlab jurnalistlar haqidagi xabarni rad etdi

Turkiya prezidenti Rajab Toyyib Erdo‘g‘an mamlakatda ayni damda 150 dan ortiq jurnalist hibsda saqlanayotgani haqidagi ma'lumotni rad etdi. Bu haqda "Bi-bi-si" xabar tarqatgan.

"Hibsdagi kishilar jurnalistlar emas. Ularning ba'zilari terrorchilik tashkilotlari bilan hamkorlik qilgan, boshqalari qurolni saqlashgani uchun hibsga olingan. Yana boshqalar esa vandalizm va bankomatlarni talashgani tufayli qamoqda", - deya ma'lum qildi u.

Erdo‘g‘an hibsga olingan ba'zi shaxslarda, ular jurnalist ekani haqida ma'lumot beruvchi beyjlar bo‘lganini tasdiqladi, biroq ularning rasmiy matbuot-kartalari bo‘lmagan.

"Ularda jurnalistlar beyjlari bor edi, biroq rasmiy matbuot-kartalari bo‘lmagan, bu beyjlar bilan ular o‘zlarini jurnalist, deb e'lon qilishmoqda. Gap, siz aytganingizdek, 170 kishi haqida borayotgani yo‘q, bu yolg‘on. Hozirda faqatgina ikki jurnalist hibsda", - deya ma'lum qildi Turkiya prezidenti.

Shu bilan birga, uning ta'kidlashicha, muxolif jurnalistlar uning uchun haqoratli bo‘lgan juda ko‘plab maqolalarni yozishda davom etmoqda.

"Bi-bi-si"ning ta'kidlashicha, Turkiyada o‘tgan yilning iyulidagi muvaffaqiyatsiz davlat to‘ntarishiga urinishdan so‘ng, 160 dan ortiq OAV yopildi, shuningdek, 2,5 mingdan ortiq media xodimlari va jurnalistlar ishdan bo‘shatildi, taxminan 150 jurnalist qamoqda.