Yaponiyadagi Nissan zavodida tintuv o‘tkazildi

Yaponiya davlat yerlari, infratuzilma, transport va turizm vazirligi mamlakatning Kioto va Totigi prefekturalarida joylashgan Nissan konsernining ikki zavodida tintuv o‘tkazishgan. Tintuv o‘tkazilishiga sabab sotuv oldidan avtomobillarning xavfsizlikka nisbatan sinov ishlari qonunchilik talablariga javob bermagani bo‘lgan, deb xabar beradi Reuters.

Xabar qilinishicha, Nissan xodimlari xavfsizlik tekshiruvini o‘tkazish uchun yetarli malakaga ega bo‘lishmagan. Yaponiya hukumatining bergan ma'lumotiga ko‘ra, korporatsiyaning 6 zavodida qoida buzilishlari ro‘y bergan bo‘lishi mumkin.

Nissan vakillari o‘tkazilgan tintuvlar haqidagi ma'lumotni tasdiqlashgan. «Ayni paytda biz zavodlarimizdagi avtomobillarning xavfsizlik tekshiruviga oid surishtiruv ishlarini olib bormoqdamiz», — degan kompaniya matbuot kotibi Nik Maksfild.

Ilgariroq Nissan rahbariyati 2014 yilning oktabridan boshlab ishlab chiqarilgan 20ta turli modellarga oid 1,2 million mashinani chaqirib olish kampaniyasi boshlanganini e'lon qilgan edi.