Kun.uz muxbirining xabar berishicha, vazir qadim o‘tmishdan Markaziy Osiyo hududida rivojlanib kelgan savdo-iqtisodiy hamkorlik va yo‘llarga to‘xtalib o‘tib, uni zamonaviy ko‘rinishda qayta tiklashga umid bildirgan.
«O‘tgan yaqin haftada Qirg‘izistonda demokratik tamoyillarga mos prezidentlik saylovi bo‘lib o‘tdi. Endilikda hukumat 2040 yilgacha mo‘ljallangan harakatlar strategiyasi ko‘rinishidagi davlat dasturini qabul qilishga tayyorgarlik ko‘rmoqda. Unda yuqori texnologiya yutuqlaridan foydalangan holda elektron hukumat loyihasini amaliyotda joriy qilishni rejalashtirganmiz. Har bir ko‘zlagan maqsadimiz, loyihamizning markazida inson omili turibdi, uning huquqlari, xavfsizligi va erkinligi.
Mintaqa davlatlarining iqtisodiy rivojlanishi esa ularning o‘zaro hamkorligiga bog‘liq ekani ko‘p bor takrorlandi. Ammo mamlakatlar orasida chegara nazorati, savdo-iqtisodiy munosabatlarni tartibga solishda haligacha murakkab masalalar yechilmay qolayotgani rost. Shu bilan birgalikda, mamlakatlarning iqtisodiy qudrati to‘liq namoyon bo‘lmadi. Qozog‘iston bilan Qirg‘iziston chegarasida nazoratni sun'iy oshirish tovar-ayirboshlash uchun yaratilgan platformani nosog‘lom holga olib kelmoqda», deb fikr bildirdi vazir.
Vazir shu o‘rinda O‘zbekiston va Qirg‘iziston chegaralarini demilitatsiya etish bo‘yicha tuzilgan ishchi guruhning faoliyatiga baho berib, bu tarixiy natijani qo‘lga kiritish uchun qo‘yilgan qadam, deya e'tirof etdi.
