«Rossiya va AQSh Suriyadan qo‘shinlarni olib chiqishi kerak» - Erdo‘g‘an bayonot berdi

Turkiya prezidenti Rajab Toyyib Erdo‘g‘an Rossiya va AQShni Suriyadan qo‘shinlarni olib chiqib ketish hamda inqirozga siyosiy yo‘l bilan yechim topishga bor e'tiborni qaratishga chaqirdi.

Rossiya va AQSh prezidentlari Vladimir Putin hamda Donald Tramp shanba kuni Suriya bo‘yicha qo‘shma bayonotni Osiyo-Tinch okeani iqtisodiy hamkorligi sammiti davomida ma'qullashdi. Hujjatga ko‘ra, Putin va Tramp Moskva hamda Vashington IShID terrorchilik guruhi bilan, u butunlay tor-mor etilmagunicha kurash olib borish bo‘yicha qo‘shma sa'y-harakatlarni davom ettirishini tasdiqladilar.

"Aytilmoqdaki, Suriya inqirozini harbiy yo‘l bilan hal qilib bo‘lmaydi. Unda ular o‘z harbiylarini ortga qaytarishlari lozim hamda shunda inqirozning yechimi siyosiy bo‘ladi. Keling, bu masalalarda birga ishlaymiz", - deya aytib o‘tdi Erdo‘g‘an Putin bilan muzokaralar o‘tkazish uchun Sochiga uchib ketishidan avval.

Uning qo‘shimcha qilishicha, Turkiya AQSh qo‘shinlari Iroqqa 2003 yilda bostirib kirishiga qarshi bo‘lgan.

"Biroq ular kirishdi hamda u yerda qolmasliklarini aytishdi. Ketishdimi? Yo‘q. Jahon ahmoq emas. Ko‘p holatlarda bir narsa aytiladi, boshqasi esa qilinadi, afsuski. Amerikaning Suriya shimolida beshta baza hamda boshqa mintaqalarda yana sakkizta bazasi bor – hammasi bo‘lib 13 ta. AQSh u yerga yetkazib bergan qurol bor. Rossiya Suriyada beshta bazaga ega. Bu ko‘z yumib bo‘lmaydigan narsalarni nima qilish kerak?" – deya aytib o‘tdi Erdo‘g‘an.