Samarqandlik ayol AQShda 150 million dollarlik firibgarlikni amalga oshirgan

AQShda sog‘liqni saqlash sohasida yirik firibgarlik sxemasi fosh etildi. Undan ko‘rilgan zarar 150 million AQSh dollariga yaqin summani tashkil etadi, deb yozadi The New Post nashri Bruklin tumani prokurori Erik Gonsalesga asoslanib.

Ish bo‘yicha 20 kishi hibsga olingan, jumladan, Nyu-York politsiya departamentining vrachlari va jarrohlari ham. Gumon qilinishicha, ular kam ta'minlangan bruklinliklarning ojizligidan foydalanib, Medicaid va Medicare davlat dasturlari uchun ajratilgan pullarni aldov yo‘li bilan o‘zlashtirib kelishgan. Hibsga olinganlarning ko‘pchiligi sobiq sovet respublikalaridan kelib chiqishgan.

Prokuratura ma'lumotiga ko‘ra, firibgarlik sxemasi boshida 35 yoshli Kristina Mirbabayeva turibdi. Ijtimoiy tarmoqlarda joylashtirilgan ma'lumotlariga ko‘ra u AQShga O‘zbekistonning Samarqand shahridan kelgan. Nima bo‘lganda ham, u shu shahardagi maktab va oliygohda o‘qigan.

Ham shahar, ham federal darajada o‘tkazilgan surishtiruvlarga ko‘ra, 2015 yilning 1 yanvaridan 2017 yilning 30 noyabriga qadar firibgarlar davlatning kamida 146 million dollarini o‘zlashtirishgan.

Hiyla shundan iborat bo‘lganki, maxsus yollovchilar ijtimoiy imtiyozlar berilishi kerak bo‘lgan insonlarni 30 yoki 40 dollar evaziga sug‘urta olib, firibgarlik sxemasi tarkibiga kiruvchi klinikalardan birida tekshirishdan o‘tishga rozilik berishlari kerak bo‘lgan. Bunday klinikalar Bedford-Stayvesant, Shihshed Bey, Kanarsi, Kreyvsend va Kraun-Haytsda joylashgan.

Potentsial bemorlarni ular asosan kam ta'minlangan shaharliklar yashovchi joylardan izlashgan. Xususan, ayblov hujjatlarida Ist Nyu-Yorkdagi qashshoqlarga mo‘ljallangan oshxona va Bushvikdagi ishga joylashtirish markazi tilga olingan. Rekruterlar o‘zlari yollab kelgan har bir bemor uchun 30 dollardan 50 dollarga olishgan.

Davlat sug‘urtasiga ega fuqaro ko‘rsatib o‘tilgan tibbiyot ofisiga kelib, o‘ziga mutlaqo zarur bo‘lmagan 25-50 dollarlik muolajani bir marta olsa bas, shundan so‘ng uning sug‘urta polisi raqami tibbiyot xizmat ko‘rsatish uchun davlatdan pul olishga ko‘p marotaba ishlatilgan.

Aldov yo‘li bilan olingan pullar butun dunyo bo‘ylab joylashgan ko‘pgina soxta kompaniyalar orqali yuvilgan.

Mirbabayeva xonim esa bu holatda ijtimoiy tarmoqlarda tinmasdan dabdabali sayohatlari, qimmatbaho xaridlari — zargarlik taqinchoqlari, dizaynerlik sumkalari va kiyimlarini ko‘z-ko‘z qilib turgan. Bundan tashqari, u Bruklinning badavlat kishilar yashaydigan qismida 3,25 million dollarga apartament sotib olgan, uning hamkorlaridan biri esa Brayton-Bichda 2,8 million dollarga kvartira xarid qilgan. Firibgarlikda to‘rt nafar vrach ham ishtirok etgan — Hamid Alam, Jyeffri Chess, Kevin Kyortis va Robert Vakkarino. Sanalganlarning so‘nggisi Nyu-York politsiya departamentida xizmat qilgan. NYPD’ning 61 yoshli jarrohi soxta tahlillarni “qayta shifrlash” ishiga mas'ul bo‘lgan. Ularning barchasi hozir hibsga olingan.