Tashqi ishlar vazirligi tuzilmasi o‘zgartiriladi. Abdulaziz Komilovga topshiriq berildi

O‘zbekiston prezidenti Shavkat Mirziyoyev Oliy Majlis palatalariga Murojaatida mamlakatimizning investitsiya jozibadorligini oshirish, xorijiy sarmoyalar va chet ellik sayyohlarni keng jalb etish O‘zbekistonning xorijiy davlatlardagi elchixonalarining asosiy vazifalaridan bo‘lishi kerakligini ta'kidladi. 

Oliy Majlis Senati va Qonunchilik palatasi a'zolariga Murojaatnomasida Tashqi ishlar vazirligida amalga oshirilajak o‘zgarishlar haqida gapirdi.

«Barcha elchilar eshitsin, Yangi yildan boshlab ish uslubi o‘zgaradi. Agar har haftada investitsiya bo‘yicha aniq takliflarni bermasa, O‘zbekistonga hech bo‘lmaganda 10 nafar turist jo‘natmasa bunday elchi bizga kerak emas. Sayyohlik ham investitsiya.

Elchini bundan buyon o‘zim tanlab-tanlab tayinlayman. Elchi vatanparvar bo‘lishi kerak, vatanga xizmat qilishi kerak.

Siyosatni o‘zim yaxshi bilaman. Internetda ma'lumotni sizlardan ham oldin bilaman. Investitsiya kerak. Investitsiya, investitsiya va investitsiya. Turizm, turizm va turizm.

15 yanvar kuni Tashqi ishlar vazirligi tuzilmasini mutlaqo o‘zgartiramiz. Boshqa tizim bo‘ladi.

Tashqi ishlar vaziri haftada ikki marta elchilar bilan gaplashib, nechta sayyoh keladi, qanday investitsiya kiritiladi, elchi qaysi zavodlarga bordi, qaysi mahsulotlar arzon, qanday texnologiya olib kelsa bo‘ladi, mana shularni muhokama qilishi kerak.

1 fevraldan hamma elchixonani yopaman, shunga mos bo‘lsa, ishlaydi, bo‘lmasa yo‘q, yangi elchilarni qo‘yaman.

10-15 yanvargacha har bir elchi tizim bilan keladi, o‘zim birma-bir gaplashaman, to‘g‘ri kelsa ishlaydi, bo‘lmasa yo‘q», dedi prezident.

Videokonferensiya aloqa shaklida o‘tgan majlisda mamlakatimizning butun dunyodagi diplomatik vakolatxonalari vakillari ham qatnashdi. 

Mamlakatimizning Xitoy, Janubiy Koreya, Turkiyadagi Favqulodda va muxtor elchilari aloqaga chiqib, Prezidentimizning tashriflaridan so‘ng ushbu mamlakatlar bilan hamkorlik yanada faollashganini, qo‘yilayotgan vazifalar asosida elchixonalar faoliyati yangicha mezonlar asosida tashkil etilayotganini qayd etdi.