2-3 yanvar kunlarida Angliya chempionatida 22-tur uchrashuvlari o‘tkazildi. «Tribuna» turning asosiy voqealarini ko‘rib chiqadi.
Morata - memlar qahramoni
Bu mavsumda Angliya chempionatidagi eng tomoshabop o‘yin Londonda, «Emireyts» o‘yingohida bo‘lib o‘tdi. «Arsenal» «Lester»ga qarshi o‘yinda irodali g‘alabaga erishgandi, «MYu»ga qarshi o‘yin de Xeaning benefisiga aylandi, «Liverpul» (3:3) va «Chelsi»ga (2:2) qarshi o‘yinlarning oxirgi daqiqalari dahshatli tarzda kechdi.
3 yanvar oqshomida kechgan uchrashuvda «Chelsi» hujumchisi Alvaro Morata qulay imkoniyatlarni ko‘kka sovurmaganida, o‘yinning ikkinchi qismi bu qadar kurash ostida kechmagan bo‘lardi. Ammo ispaniyalik futbolchi gol urmaslik qiyin bo‘lgan vaziyatlarda buni uddaladi va memlar qahramoniga aylandi. Internetda shunday hazilomuz ibora aylanmoqda «Tupak hamon tirik bo‘lardi, agar uni Morata o‘qqa tutganida».
Arsen Venger esa o‘yindan keyin hakamlikdan qattiq norozilik bildirdi. Uning fikricha, Azar bilan bog‘liq vaziyatda penalti berishga asos yo‘q edi.
U bundan ham asabiy bo‘lishi mumkin edi, agar o‘yinda oxirgi daqiqalarda hisob Bellerin tomonidan tenglashtirilganidan keyin Dzappakostaning zarbasi to‘sindan qaytmay gol bo‘lganida. Undan jurnalistlar shunday ehtimolga reaksiyasini so‘rashdi. Uning javobi esa shunday bo‘ldi: «O‘zimni o‘ldirgan bo‘lardim».
Barhayot De Bryuyne
«Manchester Siti»ni yengib bo‘lmaydi, uning yetakchisini to‘xtatib bo‘lmaydi. «Kristal Pelas»ga qarshi o‘yin oxirida Pancheon tomonidan qo‘pollik bilan yiqitilgach, zambilda maydondan olib chiqib ketilgan Kevin De Bryuynening oyog‘i singani, u kamida ikki hafta maydonga qayta olmasligi kutilgandi. Ammo u 48 soat o‘tib yana maydonda va «Uotford»ga qarshi o‘yinda jamoasining g‘alabasiga yordam berdi, uning pasini raqib futbolchisi Kabasele o‘z jamoasi darvozasiga kiritib yubordi. Unga qo‘pollik qilgan va o‘zi ham zambilda maydondan olib chiqilgan Pancheon esa bu mavsumda futbol o‘ynamaydi.
