Venesueladagi turmada ko‘tarilgan g‘alayonda 78 kishi halok bo‘ldi – OAV

Lotin Amerikasi ommaviy axborot vositalari Venesuelaning Karabobo shtatidagi mahbuslarni saqlash markazida yuz bergan g‘alayon va yong‘in oqibatida 78 kishi halok bo‘lganini ma'lum qildi.   

Venesuela hukumatidan bu borada hozircha rasmiy axborot yo‘q, biroq bir nechta nashr, jumladan Noticias Caracol radiosi, Clarin nashri, NTN24 telekanali shunday raqamlarni keltirmoqda.

OAV ma'lumotlariga ko‘ra, halok bo‘lganlar 10 ayol va 68 erkakdan iborat. Halok bo‘lgan ayollar mahbuslikdagi erlarini ko‘rgani kelgan ayollar bo‘lgan. Hammasi bo‘lib politsiya huzuridagi markazda 100 dan ko‘proq odam saqlangan.  

Voqealar 28 mart kuni ertalab boshlangan. Guvohlarning aytishicha, bino ichida kuchli otishma ovozlari eshitilgan. So‘ngra qora tutun paydo bo‘lgan. Mahbuslardan biri onasining aytishicha, o‘g‘li unga qo‘ng‘iroq qilib, kameralar oldida benzin to‘kib, ularni o‘ldirishmoqchi bo‘lishayotganini ma'lum qilgan. Qurbonlarning bir qismi kuyishdan, qolgani esa tutundan bo‘g‘ilishdan halok bo‘lgan.

Markaz binosi politsiya tomonidan o‘rab olingan. Jasadlar Valensiya shahri o‘likxonasiga yetkazilgani aytilgan.