AQSh va Janubiy Koreya Olimpiada sababli qoldirilgan harbiy mashg‘ulotlarni boshladi

AQSh va Janubiy Koreya navbatdagi katta ko‘lamli birgalikdagi harbiy mashg‘ulotlar Foal Eagle’ni boshladi. Bu haqda “Ryonxap” axborot agentligi xabar bermoqda. 

Bu mashg‘ulotlar Pyongchangdagi Olimpiada sababli qoldirilgandi. Mashg‘ulotlar aprel oxirigacha davom etadi. Mashg‘ulotlar davomiyligi o‘tgan yildagiga nisbatan qisqartirilgan. 

Axborot agentligining ma'lum qilishicha, mashg‘ulotlarda Janubiy Koreyaning barcha qo‘shin turlaridan 300 ming harbiy hamda 11,5 ming amerikalik harbiy, AQSh harbiy-dengiz kuchlarining Wasp desant kemasi boshchiligidagi kemalari otryadi, qisqa masofadan parvoz qiluvchi va vertikal qo‘nuvchi F-35B samolyotlari ishtirok etmoqda.   

Ta'kidlanishicha, mashg‘ulotlar vaqtida Shimoliy Koreyaning asabiga tegmaslik uchun faqat mudofaa vositalari qo‘llanadi.

Shuningdek, ushbu davlatlar aprel o‘rtalarida Key Resolve qo‘mondonlik-shtab mashg‘ulotlarini o‘tkazadi. Unda 12,2 mingga yaqin amerikalik va 10 mingga yaqin janubiy koreyalik harbiy ishtirok etadi.