Xitoy savdo mojarosi uchun butun mas'uliyatni AQSh zimmasiga yukladi

Xitoy va AQSh o‘rtasidagi yuzaga kelgan savdo mojarosi uchun javobgarlik to‘liq Amerika zimmasida, dedi XXR TIV rasmiy vakili Gen Shuan.

"Xitoy va AQSh o‘rtasida yuzaga kelgan savdo mojarosi Amerika tomondan bir tomonlama tartibda boshlangan va buning uchun javobgarlik to‘liq Amerika zimmasida", - dedi u brifingda.

Tashqi ishlar vazirligi idorasi vakilining ta'kidlashicha, AQShning xatti-harakatlari xalqaro savdo-sotiq tamoyillari va nufuzini buzgan, shuningdek bu AQSh tomonidan berilgan va'daga vafo qilmaslik hisoblanadi. 

"Bu na Xitoy manfaatlariga, na AQSh manfaatlariga va na dunyo manfaatlariga to‘g‘ri kelmaydi", - deya ta'kidladi Gen Shuan. U hozirga qadar Xitoy tomonidan qabul qilingan choralar AQShning bir tomonlama siyosatiga javob reaksiyasi hisoblanishini qo‘shimcha qildi. 

Bundan avval AQSh Xitoy tovarlariga nisbatan yig‘imlarni 50 milliard dollarga oshirishga doir qaror qabul qilgan edi. Yangi yig‘imlar Xitoyning 1,3 ming turdagi tovariga nisbatan belgilangan bo‘lib, bu XXR tomonidan Amerika mahsuloti intellektual huquqlarini buzishga javoban qo‘llangan chora ekani qayd etildi. AQSh shu tariqa Xitoy bilan ko‘p milliardli savdo kamomadini yengib o‘tmoqchi. Juma kuni Tramp mutasaddi tashkilotlarga Xitoy tovarlariga yig‘imlarni 100 milliard dollarga oshirish imkonini o‘rganib chiqish vazifasini bergan.

Bunga javoban Xitoy Davlat kengashi AQShdan import qilinuvchi 106 turdagi tovarga 25 foiz qo‘shimcha to‘lovlar kiritdi.