MIB tomonidan 6 oy ichida ijro hujjatlari bo‘yicha 8,7 trln so‘m mablag‘lar undirildi

Joriy yilning 24 iyul kuni O‘zbekiston Respublikasi Bosh prokuraturasi hay'atining navbatdagi majlisi bo‘lib o‘tdi.

Mahkama axborot xizmati xabarida qayd etilishicha, aniqlangan tizimli qonun buzilishlarni amaldagi qonunchilikni takomillashtirish va huquqni qo‘llashda yagona amaliyotni shakllantirish orqali bartaraf etishga qaratilgan faoliyat kuchaytirilib, Bosh prokuratura tomonidan ishlab chiqilgan 29ta qonun hujjatlari loyihalari belgilangan tartibda qabul qilingan.

Bosh prokuratura huzurida Majburiy ijro byurosi tomonidan joriy yilning 6 oyi davomida iste'molchilarga yetkazib berilgan energiya resurslari va ichimlik suvi uchun 14,2 trln so‘m, ijro hujjatlari bo‘yicha 8,7 trln so‘m mablag‘lar undirilishi ta'minlangan.

Shu bilan birga, hay'at yig‘ilishida 2018 yil 1-yarmida prokuratura, Departament, Byuro va Inspektsiya organlari faoliyatida yo‘l qo‘yilgan ayrim kamchiliklar keskin tanqid qilinib, tegishli prokurorlar, Departament, Byuro, Inspektsiya rahbar xodimlarining tushuntirishlari eshitildi.

Prokuratura organlari zimmasiga yuklatilgan barcha vazifalarni so‘zsiz ijro etish, O‘zbekiston Respublikasi prezidentining farmon, qaror va farmoyishlari, topshiriq va ko‘rsatmalarining qat'iy bajarilishi ustidan nazoratni yanada kuchaytirish topshirildi.

Xususan, o‘ta dolzarb hisoblangan farmatsevtika tarmog‘ini rivojlantirish, xotin-qizlar huquqlarini himoya qilish, eksport hajmini oshirish, narxlar barqarorligini ta'minlash, byudjyetga tushumlarni ko‘paytirish, yoshlar bandligini ta'minlash, “Obod qishloq”, “Obod mahalla” va “Yoshlar-kelajagimiz” davlat Dasturlarini amalga oshirishda yo‘l qo‘yilayotgan kamchiliklar tahlil qilinib, bu borada nazorat samaradorligini oshirish ko‘rsatib o‘tildi.

Prokuror nazorati tadbirlarida qonunbuzarliklarning asl sabablarini aniqlash va bartaraf etish, huquqni qo‘llash sohasida yagona amaliyotni shakllantirish, shu jumladan, qonunchilikni takomillashtirish, prokuror nazorati amaliyoti sifati va ta'sirchanligini oshirishning barcha zarur choralarini ko‘rish topshirildi.