Fargʻonada MIB faoliyatiga oid noodatiy holat kuzatildi: byuroning Fargʻona shahar boʻlimi davlat ijrochisi viloyat boshqarmasiga nisbatan ijro ishi qoʻzgʻadi.
Fuqarolik ishlari boʻyicha Fargʻona tumanlararo sudining hal qiluv qaroriga koʻra, ish tafsiloti MIB Fargʻona viloyati boshqarmasi taftishchisining noqonuniy ishdan boʻshatilgani bilan bogʻliq.
Daʼvogar Asqar Yusupov 2020-yil 4-dekabrdan MIB Fargʻona viloyati boshqarmasi taftishchisi lavozimida ishlab kelgan. Byuro direktorining 2024-yil 8-iyuldagi buyrugʻi bilan lavozimidan ozod qilingan. Boshqarmaning 2024-yil 17-iyuldagi buyrugʻiga asosan esa xizmatdan boʻshatilgan.
Asqar Yusupov Fargʻona viloyat sudi fuqarolik ishlari boʻyicha sudlov hayʼati taftish instansiyasining 2025-yil 3-dekabrdagi ajrimi bilan xizmatga tiklangan. Boshqarmadan uning foydasiga 217 mln soʻm ish haqi, 15 mln soʻm maʼnaviy zarar undirilishi belgilangan. Oliy sud fuqarolik ishlari boʻyicha sudlov hayʼati taftish instansiyasining 2026-yil 24-fevraldagi ajrimi bilan ish haqi 215 mln soʻmga oʻzgartirilgan.
Daʼvogar hozirda xizmatga tiklangan boʻlsa-da, unga lavozim va ish haqi berilmaganligini bildirib, daʼvoni qanoatlantirishni, shuningdek, majburiy progul uchun ish haqi va ish haqi toʻlovlari kechiktirilganligi sababli kompensatsiya undirishni soʻragan.
FIB Fargʻona tumanlararo sudining 2026-yil 20-iyuldagi qarori bilan qarzdor MIB Fargʻona viloyati boshqarmasidan daʼvogar Asqar Yusupov foydasiga 78 mln soʻm majburiy progul uchun ish haqi, 564,4 mln soʻm kompensatsiya undirish belgilangan.
2026-yil 10-sentabrda MIB Fargʻona shahar boʻlimi davlat ijrochisi mazkur qarzdorlikni undirish boʻyicha MIB Fargʻona viloyati boshqarmasiga nisbatan ijro ishi qoʻzgʻagan. Tartib boʻyicha boshqarmaga ijro talablarini ixtiyoriy bajarish uchun 15 kunlik muddat belgilangan.
Qarzni ixtiyoriy toʻlashning 15 kunlik muddati tugash arafasida. Ammo hozircha boshqarma ijro talablarini bajarmagan. Agar qarzdorlik bu muddatda yopilmasa, davlat ijrochisi oʻz rahbariyatiga nisbatan taʼsir choralarini koʻrishi kerak boʻladi.
